Qylmystyq kúdikke ilikken 62 adam Qazaqstanǵa ekstradıtsııalandy
«2017 jyldyń ishinde shet memleketterden Qazaqstan Respýblıkasyna 62 adam ekstradıtsııalandy. Shet elderdiń quzyrly organdarynyń suraýy boıynsha 110 adam berildi», - dep atap ótilgen Bas prokýratýranyń málimetinde.
Budan bólek, Bas prokýratýra Aqjarqyn Turlybaıǵa qatysty sońǵy sot úkimi shyqqannan keıin tıisti quqyqtyq sharalardy iske asyrýǵa bolatynyn habarlady.
«Qazaqstan Respýblıkasynyń azamatshasy Aqjarqyn Turlybaı sot sheshimimen Qytaı aýmaǵynda bas bostandyǵynan aıyrylǵan jaǵdaıda, Qazaqstan men QHR arasyndaǵy 2011 jylǵy 22 aqpandaǵy Sottalǵandardy berý týraly shartqa sáıkes, qalǵan merzimdi elimizde óteý úshin ony elge qaıtarý múmkindigi bar», - delingen berilgen jaýapta.
Budan buryn habarlanǵandaı, Aqjarqyn Turlybaıdyń isi boıynsha sońǵy sot úkimi 2017 jyldyń aıaǵyna deıin shyǵatyny málim bolǵan edi. Alaıda keıinnen sot úkimi aqpanda jarııa etiletini týraly aqparat tarady.
Aıta ketý kerek, Aqjarqyn Turlybaı 2014 jyldyń naýryzynda Gýanchjoý áýejaıynda ustalǵan bolatyn. Qyzdyń sómkesinen 4,5 keli amfetamın tabylǵan. Anasynyń aıtýynsha, kıim satyp alýǵa ketken Aqjarqynǵa bireýler esirtki salyp jibergen. 2016 jyldyń 2 qarashasynan bastap QHR Gýandýn provıntsııasynyń soty Aqjarqyn isin qaıta qarap jatyr.
