Qylmystyq kodekstiń jobasy birinshi oqylymda maquldandy - Májilis
ASTANA. QazAqparat - Búgin Parlament Májilisiniń jalpy otyrysynda palata depýtattary Qazaqstan Respýblıkasynyń Qylmystyq kodeksiniń jobasyn birinshi oqylymda maquldady.
Jańa redaktsııadaǵy Qylmystyq kodekstiń jobasy jańa qylmystyq-quqyqtyq ınstıtýttar qurý qajettiligi, sonymen qatar, qalyptasqan qoǵamdyq qatynastardyń ózgerýi, buryn belgisiz bolǵan qaýip-qaterlerdiń týyndaýy aıasynda jeke adamnyń, qoǵam men memlekettiń barabar qorǵalýyn qamtamasyz etý maqsatynda ázirlengen. Qylmystyq kodekstiń jańa redaktsııasyn qabyldaýdyń eń basty oń nátıjesi retinde qoǵamdyq qatynastarda birqatar barynsha tıimdi áreketter qarastyrylyp otyr. Máselen, kodeks jobasynda usaq qylmystyq quqyq buzýshylyqtardyń aldyn alýdy kúsheıtý arqyly aýyr qylmystar deńgeıin azaıtylýy kútiledi. Ekstremızm men terrorızm úshin jaýaptylyq qatańdatý usynylady, radıkaldy ıdeologııalardyń taralýyna yqpal etetin is-áreketterge qylmystyq sıpat berýge oraı ulttyq kelisim men áleýmettik turaqtylyqty qorǵaýdyń neǵurlym joǵary deńgeıi kózdeledi. Uıymdasqan jáne mamandandyrylǵan qylmyskerlikpen, onyń ishinde aqparattyq tehnologııalar men medıtsına salasyndaǵy qylmyspen kúreske baǵyttalǵan jańa normalar engiziledi.
«Jalpy alǵanda kodeks jobasy zaman suranysyna saı ázirlengen. Onda tek zań qoldaný tájirıbesinen jınaqtalǵan normalar ǵana emes, elimiz ratıfıkatsııalaǵan halyqaralyq konventsııalar erejeleri de keńinen kórinis taýyp otyr. Kodekstiń eń basty jańalyǵy - ol qylmystyq teris qylyq ınstıtýty ekenin aıta ketken jón»,- deıdi depýtat Nurlan Ábdirov.
Tutastaı alsaq, jobany qabyldaý adam quqyqtary men bostandyqtarynyń, qoǵam men memleket múddeleriniń qoǵamdyq qaýipti qolsuǵýshylyqtardan sapalyq turǵydan qorǵalý dárejesiniń jańa deńgeıin qamtamasyz etýge múmkindik beredi.
