Qylmystyq kodekstiń jańa jobasynda jala japqany úshin qylmystyq jaýapkershilik saqtalady - Bas prokýratýra
ASTANA. 27 naýryz. QazAqparat - Qylmystyq kodekstiń jańa jobasynda jala japqany úshin qylmystyq jaýapkershilikke tartý saqtalady.
Bul týraly búgin Astanada «Qazaqstan Respýblıkasynyń medıa zańnamasyn reformalaýdyń keleshegi» atty taqyrypta ótip jatqan dóńgelek ústel otyrysy barysynda sóz sóılegen QR Bas prokýratýra ınstıtýty kadrlardy bastapqy daıyndaý basqarmasynyń basshysy Rýslan Toqtaǵulov málim etti.
«Dıffamatsııa úshin qylmystyq jaýapkershilikti joıý máselesi asa mańyzdy, sonymen birge kúrdeli mindet. Degenmen, biz osy máseleni ońtaıly sheshýge kóp mán beremiz. Bul baǵytta Bas prokýratýra 2010 jyldan beri zańnamalardy izgilendirýdi qolǵa alyp kele jatqany belgili. Al Parlament Májilisine engizilgen zań jobasynda jala japqany jáne ar namysyna nuqsan keltirip, jábirleý sekildi eki qylmystyq quramdy qylmyssyzdandyrý qarastyrylǵan edi. Alaıda, ókinishke qaraı, joǵary ókiletti organ bul bastamany qoldamady», - deıdi R. Toqtaǵulov.
Onyń sózine qaraǵanda, Qylmystyq kodekstiń qazirgi jobasynda bastapqyda atalǵan qylmys quramy qylmystyq aıyptar sanatynda qarastyrylyp, ol boıynsha bultartpaý túrindegi aýyr jazany qoldanýdan bas tartý kózdelgen. «Ókinishke qaraı, Kodeks jobasyn vedomstvoaralyq jumys tobyndaǵy talqylaýlarda bul bastama taǵy da qoldaý tappady. Onyń ishinde jala japqany úshin qaralatyn qylmys quramy boıynsha bas bostandyǵynan aıyrý sekildi jaza túri saqtalyp otyr», - dedi R.Toqtaǵulov.
