Qylmystyq Kodekstiń jańa jobasyna «medıtsınalyq qylmys» uǵymy engizildi - Nurlan Ábdirov
ASTANA. QazAqparat - Qylmystyq Kodekstiń jańa jobasyna buryn bolmaǵan «Medıtsınalyq qylmystar» bólimi engizildi. Bul týraly búgin Ortalyq kommýnıkatsııalar qyzmetinde bolǵan brıfıngte QR Parlamenti Májilisiniń depýtaty Nurlan Ábdirov málim etti.
«Qylmystyq Kodekske jańa bólim engizildi. Ol «Medıtsınalyq qylmystar» dep atalady. Onyń negizgi jańalyǵy - farmatsevtıka salasyndaǵy alaıaqtyq áreketter zańmen jazalanatyn bolady», - dedi N.Ábdirov.
Aıta keteıik, Qylmystyq Kodekstiń jańa jobasy Parlamentte talqylanýda.
Qoldanystaǵy Qylmystyq Kodeks 1998 jyldyń 1 qańtarynda kúshine engen bolatyn. N.Ábdirovtiń aıtýynsha, sodan beri oǵan 50-den astam ózgertýler engizilgen.
«Ony zaman talabyna saı etý úshin osy jyldar aralyǵynda talaı jumystar jasaldy. Ýaqyttyń synynan sátti ótken sol ózgertýler Kodekstiń jańa jobasynda qaldyryldy», - deıdi ol.
