Qylmystyq kodeksti yqshamdaýymyz kerek - Joǵarǵy sot tóraǵasy
ALMATY. Aqpannyń 8-i. QazAqparat /Erlik Erjanuly/ - Qylmystyq kodekstegi jeńil dárejedegi qylmystardyń bárin ákimshilik jaýapkershilikke kóshirý kerek.
Búgin Almatyda ótip jatqan "Qazaqstan Respýblıkasynyń qylmystyq saıasaty: jaı-kúıi jáne ony lıberalızatsııalaýdyń negizgi baǵyttary" dep atalatyn dóńgelek ústel jıynynda aıtyldy, dep habarlaıdy QazAqparat.
"Gýmanızatsııa degen sózdiń ózin qazaqy maǵynada izgilik dep aıtamyz ǵoı. Qylmystyq quqyqty lıberalızatsııalaý kezinde aldymen qaı baǵytta is júrgizetinimizdi belgilep alýymyz kerek. Qazir arnaıy qurylǵan jumys toby osy máselemen aınalysyp jatyr. Qylmystyq kodekste qylmystyń kóptegen quramdary bar. Búgingi tańda ondaı qajettilik bar ma, joq pa ony zertteý kerek. Quqyqtyq mádenıet, quqyqtyq tártip máselesinde azdy-kópti kemshilikterimiz joq emes. Ony eskere otyryp, qylmystyq jaýapkershilikke tartpastan buryn Qylmystyq kodekstegi jeńil dárejedegi qylmystardyń birazyn ákimshilik jaýapkershilike kóshirý kerek. Ákimshilik jazaǵa tartý barysynda eger ol qaıtalaıtyn bolsa ǵana qylmystyq jaýapkershilikke tartý máselesin qolǵa alýymyz qajet", - deıdi Joǵarǵy Sot tóraǵasy Musabek Álimbekov. M. Turǵynbekulynyń aıtýynsha, Qylmystyq kodekste jaýapkershilikke tartýdyń 3 túrli baǵyty bar. Birinshisi, ashyqtan-ashyq aıyptaý, ekinshisi - jeke aıyptaý, úshinshisi - aralas aıyptaý. Jeke aıyptaýdy kóbirek engizip, Qylmystyq kodeksti yqshamdaýymyz kerek. Biz bul máseleniń bárin memlekettik organdardyń qolyna berip qoıǵanmyz. Qazir jeke adamnyń múddesi buzylyp otyrǵan jaǵdaıda oǵan memlekettik organdardyń qol suǵa berýi qanshalyqty durys degen másele kún tártibinde tur.
