Qylmystyq kodeks jobasyndaǵy jemqorlyqqa qarsy normalardyń mańyzy zor - O. Jumabekov
ASTANA. QazAqparat - Qylmystyq kodeks jobasyndaǵy jemqorlyqqa qarsy normalardyń mańyzy zor. Búgin Parlament Májilisiniń jalpy otyrysynda talqyǵa túsken jańa redaktsııadaǵy Qylmystyq kodeks jobasyna qatysty depýtat Ońalsyn Jumabekov osyndaı pikir bildirdi.
«Qylmystyq kodeks jobasynda sybaılas jemqorlyq qylmystary úshin jaýapkershilik kúsheıtilip otyr. Bul tolyq aqtalatyn norma dep paıymdaımyn. Óıtkeni, qazirgi tańda sybaılas jemqorlyqqa qarsy kúrestiń ózektiligi esh kúmán týdyrmaıdy», - deıdi depýtat O. Jumabekov.
Depýtattyń paıymynsha, joba sybaılas jemqorlyqqa qarsy kúres boıynsha birqatar qylmystyq-quqyqtyq jańalyqtardy engizip, osy baǵyttaǵy sharalardy retteý men qoldanýdy naqtylaıdy. «Qylmystyq kodeks jobasynda sybaılas jemqorlyq qylmysy úshin sottalǵandar barlyq memlekettik marapattardan, arnaýly áskerı nemese qurmetti ataqtardan, synyptyq shennen, dıplomatııalyq rangten, biliktilik synybynan aıyrý qarastyrylady. Memlekettik qyzmetke jáne ekonomıkanyń memlekettik sektoryndaǵy qyzmetke ómir boıy tyıym salý kózdeledi. Ondaılarǵa shartty túrde sottalý, bitimgerlik pen kepilgerlik, eskerý merziminiń aıaqtalýyna baılanysty qylmystyq jaýaptylyqtan bosatý sekildi jeńildetilgen erejeler qarastyrylmaıdy. Buny tolyq qoldaımyn. Jemqorlyqqa qarsy osyndaı qatańdatylǵan sıpattaǵy jazalaýlar áleýmettik dertpen kúrestiń oń nátıjesin bereri haq», - dedi O. Jumabekov. Onyń aıtýynsha, jobadaǵy «paraqorlyq» baby da aıryqsha sıpatqa ıe. Buǵan sáıkes, jazalaý sharasy bostandyǵynan aıyrýdan basqa para somasynyń eselengen aıyppuldarymen tolyqtyrylǵan. «Mundaı sharalar jemqorlyq qylmystardyń aldyn alýǵa, áleýmettik ádildikti qalyptastyrýǵa yqpal etýge óz septigin tıgizedi», - dedi ol.
