Qylmystyq kodeks jobasynda áleýmettik janjaldardy arandatýdyń kez-kelgen áreketi úshin qatań jazalaý kózdelip otyr
ASTANA. 16 qazan. QazAqparat - Parlamenttiń besinshi shaqyrylymynyń úshinshi sessııasyn saltanatty ashqan kezde Qazaqstan Prezıdenti Nursultan Nazarbaev zańshyǵarýshylyq mindetterdiń tórtinshi mańyzdy blogy quqyq qorǵaý zańnamasyn jańǵyrtý jáne tereń reformalaýmen baılanysty ekenin atap ótti. Parlamentti Qylmystyq, Qylmystyq-is júrgizý, Qylmystyq-atqarý kodeksteriniń jańa jobalaryn qaraý jumysy kútip turǵanyn aıtty. «Shyn mánisinde, Qazaqstannyń quqyq qorǵaý jáne sot júıesiniń álemdik tájirıbeni qoldanǵan jańa quqyqtyq negizi qalyptastyrylatyn bolady», - dedi Memleket basshysy.
Odan ári sózin sabaqtaǵan Elbasy: «Kez kelgen qylmys pen zań buzýshylyq úshin jazanyń bultartpastyǵy men ádildigine eshkimniń eshqandaı da kúmáni bolmaýy tıis. Sonymen bir mezgilde quqyq buzýshylardy erkine qoıyp, azamattardyń zańǵa «jeńil qaraýyna» esirkeýshilik jasaýǵa bolmaıdy. Jańa aktilerdi qabyldaý qylmystyq sot óndirisi júıesin jańǵyrtady. Qazaqstandyq quqyq azamattardyń quqyqtary men bostandyqtaryn qorǵaýdy múltiksiz qamtamasyz etetin sapaly deńgeıge kóteriledi», - dep atap ótken bolatyn. Osy oraıda, Memleket basshysynyń tapsyrmasy boıynsha ázirlengen qylmystyq isterge qatysty kodeksterdiń jańa jobalary Úkimetten Májiliske kelip tústi. Búgin Májilistiń jalpy otyrysynda úsh kodekstiń, atap aıtqanda, Qylmystyq, Qylmystyq is júrgizý jáne Qylmystyq atqarý kodeksteriniń jańa redaktsııadaǵy nusqalary zań jobalarymen jumys isteý óndirisine alyndy. Palata otyrysynda kodeksterdiń mańyzdylyǵy týraly Májilistiń Zańnama jáne sot-quqyqtyq reforma komıtetiniń hatshysy Svetlana Bychkova aıtyp ótti. Birinshiden, Qylmystyq kodeks jobasymen iske asyrylatyn qylmystyq saıasatty damytýdyń tujyrymdy baǵyttary birinshi ret jasalǵan nemese áleýmettik turǵydan osal adamdar jasaǵan qylmysqa qatysty toleranttyq ustanymdy keńeıtedi. Ekinshiden, aýyr qylmystarǵa, qylmystyń qaıtalaný kórinisterine, uıymdasqan qylmysqa jáne sot tóreligine qarsylyq bildirýge qatysty sharalardy qatańdatady dep kútilýde. Kodeks jobasynda qylmystyq quqyq buzýshylyqty birinshi ret jasaǵan kámeletke tolmaǵandarǵa, áleýmettik turǵydan osal adamdardyń basqa da sanattaryna qylmystyq saıasatty yryqtandyrýmen jáne izgilendirýmen qatar, qylmystyń barlyq jańa túrlerine qarsy kúrestiń negizderi qalanǵan. Al krımınaldyq qyzmettiń belsendiligi baıqalatyn salalarda jazalaý qatańdatyldy. Ulttyq kelisim tuǵyryna nuqsan keltirýdiń jáne áleýmettik janjaldardy arandatýdyń kez-kelgen áreketi úshin qatań jazalaý kózdelip otyr. Kodeks jobasyn qabyldaý adamnyń quqyqtary men bostandyqtaryn, qoǵam men memlekettiń múddelerin qoǵamdyq qaýipti qol suǵyshylyqtan qorǵaý dárejesiniń jańa deńgeıin sapaly qamtamasyz etýge múmkindik beredi.
