Qylmystyq izdestirý organdary 2005- 2011 jyldary zańsyz qurylyspen aınalysqan azamattarǵa qatysty 32 qylmystyq is qozǵady
ASTANA. 8 maýsym. QazAqparat /Aıdar Ospanalıev/ - Qylmystyq izdestirý organdary 2005- 2011 jyldar aralyǵynda zańsyz qurylyspen aınalysqan azamattarǵa qatysty 32 qylmystyq is qozǵap, olardyń 26-sy sotqa joldandy.
Búgin bul týraly jýrnalıstermen kezdesken Astana qalalyq prokýratýrasynyń 2- basqarmasy bastyǵynyń orynbasary Meırambek Qanybekov málim etti.
Onyń sózine qaraǵanda, Astana qalasynyń sottary úlestik jáne mansardy qurylysyna qatysýshy azamattardy aldap ketken 39 azamatqa qatysty 23 qylmystyq isti qarap, barlyǵy boıynsha tıisti úkim shyǵarǵan. Taǵy 4 azamatqa qatysty 2 qylmystyq is qaralý ústinde. «Naqtyraq aıtqanda, osy ýaqytta Saryarqa aýdanynyń №2 sotynda «Jeti jol» turǵyn úı kesheniniń qurylysy barysynda zańsyz áreketterge jol bergen E.B.Raısova men A.B.Baımenshıeva jáne N.S.Pozdnıakovqa qatysty qylmystyq is qaralýda. Atalmysh azamattar tarapynan jiberilgen zańsyz áreketterdiń saldarynan kelgen shyǵyn 1 mıllıard 65 mıllıon 415 myń teńgeni qurap otyr. Al zańsyz áreketterdiń qurbanyna aınalǵan úleskerler sany 101 adam.
«Sondaı-aq Almaty aýdanynyń №2 sotynda «Granıtnyı» turǵyn úı keshenin salý kezinde zańsyzdyqtarǵa jol bergen I.Dmıtrıenkonyń áreketterinen kelgen shyǵyn 633 mıllıon 105 myń 368 teńgeni quraǵan. Alaıaqtyq saldarynan zardap shekkender sany 126 adam.
Qazirgi tańda bul baǵyttaǵy máseleler boıynsha tıisti sharalar atqarylýda»,-dedi prokýratýra ókili.
