Qylmystyq isterdiń úshten biri tatýlasýmen aıaqtalady - Joǵarǵy sot

ASTANA. QazAqparat - 2018 jyly Qazaqstanda qylmystyq isterdiń úshten biri taraptardyń tatýlasýymen aıaqtaldy. Bul týraly Joǵarǵy sottyń qylmystyq ister jónindegi sot alqasynyń tóraǵasy Abaı Rahmetýlın málim etti, dep habarlaıdy QazAqparat.

«Jábirlenýshimen tatýlasý sharalaryna baılanysty sottardyń qylmystyq isterdi toqtatý deńgeıi turaqty túrde artyp keledi. 2018 jyly 13 897 is toqtatyldy, bul kórsetkish barlyq isterdiń 28,7 paıyzy. Qylmystyq jaýapqa tartylǵandardyń úshten birine jýyǵy jazadan bosatalyp, jábirlenýshilerge keltirilgen shyǵyndar sot barysynda ótep berildi», - dedi A. Rahmetýlın sot júıesiniń 2018 jylǵy jumysynyń qorytyndysyna arnalǵan el sýdıalarynyń keńeıtilgen otyrysynda.

Onyń aıtýynsha, 2017 jylmen salystyrǵanda prokýror qatysqan ister boıynsha aqtaý úkimderi 2,3 esege (100-den 226-ǵa deıin) artqan. Ótken jyly Joǵarǵy sottyń kassatsııa alqasy bir jylda jeke aıyptaýlardy qospaǵanda, 51 adamdy aqtady.

Sýdıanyń atap ótýinshe, 2017 jylǵa qaraǵanda bas bostandyǵynan aıyrý jazasyna tartylǵandar azaıdy. 2018 jyly sottalǵan barlyq 7 610 adamnyń 23,9 paıyzy bas bostandyǵynan aıyryldy. Bul kórsetkish 2017 jyly 28 paıyzdy (9 405) quraǵan edi.

Taratylǵan málimetterge qaraǵanda, sottar bas bostandyǵynan aıyrýmen baılanysty emes jazalardy jıi qoldana bastady. Olardyń arasynda aıyppul, qoǵamdyq jumys, bas bostandyǵyn shekteý sekildi jazalardyń úlesi artty.

Sonymen qatar, múlikti tárkileý 8 esege azaıdy, ıaǵnı 10 700-den 1 318-ge deıin tómendedi.