Qylmystyq isterdi izgilendirý aıasynda medıatsııa ınstıtýtynyń jumysyn jandandyrý qajet - S. Romanovskaıa
ASTANA. 21 qańtar. QazAqparat - Byltyr elimizdegi sottar aıasynda 1 myń 200-ge tarta qylmystyq is medıatorlar arqyly sheshimin tapqan. Bul týraly búgin Májilistiń Zańnama jáne sot-quqyqtyq reformalar komıtetiniń keńeıtilgen otyrysynda málim boldy. Eske salaıyq, komıtet otyrysynda Qylmystyq is júrgizý kodeksiniń jańa redaktsııasy talqylanǵan bolatyn.
Toqtala ketetin jaıt, Kodeks jobasyn talqylaý barysynda depýtat Svetlana Romonovskaıa Qazaqstandaǵy medıatsııa máselesin kótergen bolatyn. Onyń aıtýynsha, elimizde búgingi tańda shamamen 2 myńǵa tarta kásibı medıatorlar qyzmet etedi. Bunyń ózi osyndaı ınstıtýttyń qoǵamdaǵy keń aýqymdy suranysyn aıǵaqtaıdy. «Sonyń ishinde ıývenaldy ıýstıtsııada qaralǵan isterdiń basym kópshiligi medıatsııa kómegimen sheshimin taýyp ta jatyr. Bul bizdiń pikirimizshe úlken progress. Sondyqtan da, Qylmystyq is júrgizý kodeksinde osyndaı jumystyń bári rettelýi tıis. Máselen, medıtorlardy túrmelerge kirgizbeıdi. Olarda arnaıy ǵımarattar da joq. Meniń oıymsha, qylmystyq isterdi izgilendirý aıasynda medıatsııa ınstıtýtynyń jumysyn jandandyrý qajet», - dedi S. Romanovskaıa. Onyń aıtýynsha, byltyrǵy jyldyń qorytyndysy boıynsha qylmystyq sot óndirisiniń tájirıbesinde 1 myń 200-ge tarta ister medıatsııa arqyly sheshimin tapqan. «Eger osydan eki jyl buryn bizdiń elimizde ásirese qylmystyq sot óndirisinde kásibı medıatorlar jetispese, qazir elimizdiń ár óńirlerinde joǵary kásibı deńgeıde qyzmetter atqaratyn medıtorlar jetkilikti. Sondyqtan da, Qylmystyq is júrgizý kodeksiniń aıasynda medıatorlar máselesi de qarastylýy kerek», - deıdi depýtat.
