Qylmystyq iske qatysty adamdy jetkizý protsedýrasyn naqtylaý qajet - Shalabaev

ASTANA. QazAqparat - Búgin QR Bas prokýratýrasy Krımınologııalyq forým ótkizdi. Alqaly jıyn barysynda qylmystyq qýdalaý salasyna quqyq qorǵaý standarttyn engizý jáne nyǵaıtý máseleleri jan-jaqty talqylandy, dep habarlaıdy QazAqparat tilshisi.

Forým barysynda BAQ ókilderine suhbat bergen QR Bas prokýratýra janyndaǵy Quqyq qorǵaý akademııasynyń prorektory Serik Shalabaevtyń aıtýynsha,  jyl basynan beri qamaýǵa alýǵa qatysty oń ózgerister kúshine engen. Adam quqyqtarynyń qorǵalýyn kúsheıtý úshin ustaý merzimi 72 saǵattan 48 saǵatqa deıin, kámeletke tolmaǵandarǵa 24 saǵatqa deıin qysqartylǵan. Al adamdardy 72 saǵatqa ustaýǵa alý merzimi tek kúrdeli isterge qatysty ǵana saqtalǵan. Sonymen qatar ol qylmystyq zańnamadaǵy kemshilikterge de toqtaldy.

«Máselen, qylmystyq protseske qatysty adamdardy jetkizý úshin qylmystyq zańnamada birneshe bap kórsetilgen. Biraq, onyń qoldaný tártibi múldem túsiniksiz.  Sol sebepten búgingi forýmda osy máseleni kóterip otyrmyz. Naqty aıtar bolsaq, birneshe myń shaqyrymnan kýágerdi, jábirlenýshini ne  bolmasa qylmystyq iske qatysty bar adamdy jetkizý úshin sot tapsyrma beredi. Mine, zańnamada sol adamdy jetkizý protsedýrasy kórsetilmegen. Onyń qansha ýaqytta jetetindigi naqtylanbaǵan.  Sonyń saldarynan búgingi jaǵdaıda  bul zań ókinishke oraı, buzylyp keledi», - dedi Serik Shalabaev.

Degenmen, akademııa prorektory qylmystyq qýdalaý salasyndaǵy zańnamany nyǵaıtýdyń nátıjesinde qamaýǵa alynǵan azamattardyń sany birshama azaıǵan. Aıtalyq, 2017 jyly 11 myńnan astam adam qamaýǵa alynsa, osy jyldyń 8 aıynda mundaı adamdardyń sany nebári 7 myńnan asady.