Qylmystyq is júrgizý kodeksiniń jańa jobasynda qylmystyq isti qozǵaý satylarynan bas tartý kózdeledi - I. Merkel
ASTANA. 21 qańtar. QazAqparat - Búgin Májilistiń Zańnama jáne sot-quqyqtyq reformalar komıtetiniń keńeıtilgen otyrysy bolyp ótti. Onda Qylmystyq is júrgizý kodeksiniń jańa redaktsııasy talqylandy.
QR Bas prokýrorynyń orynbasary Iogan Merkeldiń aıtýynsha, Kodeks jobasynyń jańa redaktsııasynyń maqsaty sot óndirisiniń tıimdiligin arttyrý, onyń jedeldigin, ońtaılylyǵyn qamtamasyz etý jáne is júrgizý ýaqytyn únemdeý bolyp tabylady. «Osyǵan baılanysty sot sýdıalarynyń birqatar ókilettikterin keńeıtý, túrmedegiler ındeksin tómendetý kózdeledi. Osynyń bári jıyntyǵynda halyqtyń quqyq qorǵaý organdarynyń jumysyna senimdilik deńgeıin arttyrýy qajet», - dedi I. Merkel. Onyń sózine qaraǵanda, kodeks jobasymen jumys barysynda Estonııa, Lıtva, Latvııa, Túrkııa, Grýzııa, Reseı men Ýkraına elderiniń qurlyqtyq quqyq tájirıbeleri keńinen pysyqtalyp, ońtaıly nusqalary engizilgen. «Onyń ishinde atap aıtqanda qylmystyq isti qozǵaý satylarynan bas tartý kózdeledi. Bul rette sotqa deıingi óndiris bastaýy bolyp qylmysqa qatysty aryzdyń tirkelýi ne bolmasa alǵashqy shuǵyl tergeý áreketteri qarastyrylady. Búgingi kúni qylmystyq isti qozǵamas buryn tergeýge deıingi tekserý jumystary júzege asady. Bul rette azamatqa nemese kásipkerge osy satyda eshqandaı kepil de, sonyń ishinde qorǵaý sharalary da qarastyrylmaǵan bolatyn», - deıdi I. Merkel.
