Qylmystyq is júrgizý kodeksi ekinshi oqylymda maquldandy - Májilis
ASTANA. QazAqparat - Búgin Májilistiń jalpy otyrysynda palata depýtattary QR Qylmystyq is júrgizý kodeksiniń jobasyn ekinshi oqylymda maquldady.
Atalǵan kodeks jobasy sot tóreligin júrgizýdiń tıimdiligin arttyrý, adam men azamattyń konstıtýtsııalyq quqyqtaryn saqtaý jáne qorǵaý kepildigin kúsheıtý maqsatynda qylmystyq sot isin júrgizýdi jańǵyrtýǵa baǵyttalǵan. Bul maqsatta qylmystyq qýdalaýdy bastaý rásimin ońaılatý kózdeledi. Sonymen qatar, tergeý men anyqtaý organdarynyń azamattar quqyqtaryn qozǵaıtyn áreketterdi derbes qabyldaý boıynsha ókilettikteri taryla túsedi. Al advokattar sotqa deıingi is júrgizýden bastap qatysýy keńeıtiledi. Sonymen birge, sot isin júrgizý de ońaılatylyp, jedeldetiledi, óıtkeni úlken kólemdi tergeý jáne sot áreketterin júrgizýdiń qajeti bolmaıdy. Sondaı-aq qylmystyq sot isin júrgizý sheńberinde jedel izdestirý sharalaryn júrgizý tártibi retteledi. Sonymen birge mezgilde mundaı áreketterge prokýrordyń sanktsııa berýi azamattardy olardyń jeke ómirine qolsuǵylmaýshylyq konstıtýtsııalyq quqyǵynyń buzylýynan qorǵaýǵa múmkindik beredi.
Taǵy bir jańalyq sottyń sotqa deıingi is júrgizýdi baqylaýyn keńeıtý maqsatynda qylmystyq protseske tergeý sýdıasy ınstıtýty engiziletin bolady. Onyń ókilettigine jekelegen tergeý áreketterine sanktsııa berýden basqa, sotqa deıingi is júrgizý satysynda taraptardyń shaǵymdary men ótinishhattaryn qaraýdy engizý de usynylady.
Qujatty ekinshi oqylymda talqylaý barysynda da birqatar túzetý engizilgen. Atap aıtqanda, azamattardyń qylmystyq protsestegi quqyqtaryn kúsheıtý maqsatynda kýányń, jábirlenýshiniń aıǵaqtaryn saqtaýǵa berý kezinde taraptardyń birdeı qatysý jaǵdaılaryna kepildik beretin norma usynylǵan. «Budan bólek, qylmystyq zańnamada jıi kezdesetin kóptegen uǵymdardy qazaq tilindegi zań mátininde birizdi qoldaný maqsatynda memlekettik termınologııa komıssııasy bekitken nusqalary qabyldandy. Nátıjesinde kodeks jobasynyń taqyryby ózgertildi», - deıdi depýtat Ramazan Sárpekov.
Sonymen qatar, kodeks jobasyn talqylaý barysynda bultartpaý sharasyn qoldaný kezindegi kepildiń mólsheri eleýli túrde (eki esege deıin) azaıtylǵan. Sondaıaq aıryqsha jaǵdaılarda, halyqtyń áleýmettik jaǵynan álsiz toptaryna qatysty kepildiń mólsheri eń tómengi mólsherden de az qoldanylýy múmkindigi qamtylǵan.
