Qylmystyq is júrgizý barysynda zorlyq- zombylyq áreketteriniń oryn almaýyn prokýratýra jiti qadaǵalaıtyn bolady
ASTANA. Aqpannyń 4-i. QazAqparat /Aıdar Ospanalıev/ - Bas prokýror eldegi prokýrorlyq qadaǵalaý sharalaryn jetildirý men bas bostandyǵynan aıyrý oryndaryndaǵy azamattardy qanaý men olarǵa qatysty ózge de zorlyq-zombylyq kórsetýdiń aldyn alý maqsatynda osy máseleler boıynsha júrgiziletin tekserý sharalarynyń erejesin bekitti.
Bul týraly búgin jýrnalıstermen bolǵan brıfıngte Bas prokýratýranyń resmı ókili Nurdáýlet Súıindikov málim etti, dep habarlaıdy QazAqparat.
Onyń sózine qaraǵanda, azamattardyń konstıtýtsııalyq quqyqtary men bostandyqtary prokýratýra qyzmetiniń basym baǵyttarynyń biri. Osyǵan qaraı prokýratýra qyzmetkerleri bas bostandyǵynan aıyrý oryndarynda otyrǵan azamattardyń quqyqtarynyń saqtalýy men olardyń qanaý jáne ózge de zańda qarastyrylmaǵan ádisterdi qoldaný máselesine basa kóńil bólip otyr. «Qazaqstannyń atalmysh másele boıynsha qol jetkizgen joǵary jetistikterin BUU-nyń Azaptaý men ózge de adamgershilikke jatpaıtyn áreketter jónindegi arnaıy baıandamashysy Manfred Novak ta moıyndady. Prokýratýra bekitken erejede qylmystyq isti qaraý barysynda azaptaý men ózge de qatigezdik áreketteriniń aldyn alýǵa baǵyttalǵan keshendi sharalar bar. Naqtyraq aıtqanda, prokýratýra qyzmetkerleri endi qylmystyq isti júrgizý barysynda aıypkerge zorlyq-zombylyq kórsetilýde degen qandaı da bir aqparat alǵan jaǵdaıda, ol istiń júrgizilý barysyn baqylaýǵa alady. Qajet jaǵdaıda tipti osy is prokýrordyń qatysýymen ǵana júrgiziledi», dedi resmı ókil.
