Qylmystyq atqarý júıesi mekemelerin ádilet organdaryna berýge bolmaıdy - Konstantın Gýdaýskas
NUR-SULTAN. QazAqparat - Qylmystyq atqarý júıesi mekemelerin ádilet organdarynyń basqarýyna berýge bolmaıdy.
Mundaı pikirdi «Qamaýdaǵylardyń quqyqtaryn qorǵaý máseleleri jónindegi koalıtsııa» qoǵamdyq birlestiginiń basshysy Konstantın Gýdaýskas aıtty, dep habarlaıdy QazAqparat tilshisi.
Koalıtsııa ókiliniń aıtýynsha, zańnan attap, qoǵamǵa qaýip tóndirgen qylmysty azamattardy árqashan kúshtik qurylymdar baqylaýy kerek.
«Qylmystyq atqarý mekemelerin ádilet organdarynyń basqarýyna berý týraly kóp aıtylyp júr. Bizdiń uıym bul bastamany qoldamaıdy. Radıkaldarmen kúshtik qurylymdar jumys isteýi qajet. Kolonııalarda tártip álsirese, ol haos kóshege kóshýi múmkin» - deıdi Konstantın Gýdaýskas.
Quqyq qorǵaýshy túzetý mekemelerindegi azaptaý faktilerine qatysty da óz pikirin bildirdi.
«Keshe ǵana Shyǵys Qazaqstan oblysyndaǵy qylmystyq atqarý júıesi mekemelerin aralap qaıttyq. Azaptaý týraly shaǵymdar kóp bolǵanymen, sonyń basym bóligi rastalmaı jatady. Ol adamdardyń zańnan attaǵanyn umytpaý kerek. Qazir abaqtylarda radıkaldyq aǵymdardyń órship turǵanyn eskergen jón. Olardyń kóbi ıslamnyń kúmándi aǵymdaryn ustanady. Biz qoǵamdyq uıym retinde buǵan qatty alańdaımyz. Bul másele boıynsha qylmystyq atqarý júıesinde naqty ustanym bolmasa, atalmysh problema bostandyqta kórinis berýi múmkin», - deıdi koalıtsııa basshysy.
Eske salsaq, búgin elordada qylmystyq atqarý júıesin reformalaý máselesine arnalǵan ashyq dıalog formatyndaǵy forým ótip jatyr.
