Qylmystyq-atqarý kodeksi qabyldandy - Parlament
ASTANA. QazAqparat - Búgin Parlament Senatynyń jalpy otyrysynda Qylmystyq-atqarý kodeksi jobasy ekinshi oqylymda qaralyp, qujat qabyldandy. Parlament qabyldaǵan kodeks endi Memleket basshysynyń qol qoıýyna joldanady.
Jalpy alǵanda, jańa redaktsııadaǵy Qylmystyq-atqarý kodeksi sottalǵandardyń quqyqtary men zańdy múddeleriniń qorǵalý deńgeıin, qylmystyq jazalardy oryndaýdyń tıimdiligin edáýir arttyrýdy, sondaı-aq sottalǵandarǵa tárbıelik turǵydan yqpal etýdiń sapasy men dárejesin jaqsartýdy kózdeıdi. Bul rette qujat boıynsha eń aldymen bas bostandyǵynan aıyrý jazasyn oryndaý tetigi jetildiriledi. Jazany oryndaýdyń buryn engizilgen progressıvtik júıesi endi qonys-kolonııalar men túrmelerge taralatyn bolady. Bul júıe sottalǵandardy ustaýdy kezeń-kezeńimen aýystyrýdy jáne olardy quqyqqa moıynsunǵyshtyqqa, tártipke baǵynǵan júris-turysqa yntalandyrady.
Osyǵan oraı, bas bostandyǵynan aıyrylǵandar aldymen óz jazalaryn ádettegi jaǵdaıda óteı bastaıdy. Alaıda, keıinnen júris-turysyna, túrmedegi is-áreketterine qaraı olardy qatal nemese jeńildetilgen jaǵdaıda ustaýmen aýystyrý qarastyrylady. Bul rette sottalǵan adamnyń minez-qulyq dárejesin mekeme bastyǵy aıqyndaıtyn bolady. Osylaısha, sottalǵandardy ustaýdyń otrıadtyq tártibinen kameralyq tártibine kezeń-kezeńmen aýysýy iske asady.
Jalpy, jańa redaktsııadaǵy kodeksti qabyldaý qoǵamnan oqshaýlaýmen baılanysty emes qylmystyq-quqyqtyq sharalardy anaǵurlym keń qoldanýǵa, sottalǵandar men jazasyn óteýden bosatylǵan tulǵalardy áleýmettik beıimdeýge jáne ońaltýǵa, penıtentsıarlyq jáne odan keıingi qylmystyń qaıtalaný deńgeıin azaıtýǵa jaǵdaı jasaıdy, sondaı-aq sottalǵandarmen júrgiziletin tárbıe protsesine jurtshylyqtyń qatysýy tetigin qalyptastyrady.
