Qylmystyq áreketterdi jasyryp qalǵany úshin 15 polıtsııa qyzmetkerine qatysty qylmystyq is qozǵaldy - aptalyq brıfıng
ASTANA. Qarashanyń 9-y. QazAqparat /Aıdar Ospanalıev/ - Aǵymdaǵy jyldyń 9 aıynda polıtsııa qyzmetkerleri 3 myń 520 qylmysty jasyryp qalǵan.
Olardyń 476-sy azamattardyń elde jasalǵan qylmystar jónindegi aryz-shaǵymdaryn qasaqana kórsetpeý áreketine qatysty bolyp otyr. Bul málimetterdi búgin jýrnalıstermen bolǵan aptalyq brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov keltirdi, dep habarlaıdy QazAqparat.
Onyń aıtýynsha, ishki ister organy qyzmetkerleri tarapynan jiberilgen osy kemshilikterdiń árqaısysy boıynsha qyzmettik tergeý sharalary uıymdastyrylyp, kináli azamattar ákimshilik jaýapqa tartylǵan. Sondaı-aq taǵy 15 qyzmetker qylmystyq jaýapqa tartylyp, olardyń 3-ýi sottalyp úlgergen. «Anyqtalǵan áreketterdiń bir parasy, ıaǵnı 933-i tıisti protsessýaldyq sheshimderdiń oryndalmaýy, al 2 myń 18-i turǵyndardyń shaǵymdary boıynsha qylmystyq is qozǵaýdan bas tartý áreketterine baılanysty bolyp otyr. Osy oraıda aıta ketetin másele, Іshki ister mınıstrligi eseptik-tirkeý tártibin qadaǵalaý sharalaryn kúsheıtti. Mınıstrlik ókilderi jaqynda prokýratýra qyzmetkerlerimen birge, Qostanaı, Almaty oblystarynda tekserý júrgizdi. Qazirgi tańda Mańǵystaý oblysy tekserilýde. Biz qylmystardyń tirkelýin qadaǵalaý maqsatynda qatań ári ashyq saıasat júrgizip otyrmyz. Biz úshin ol óte mańyzdy», dedi departament bastyǵy.
