Qylmystyq áreketten kelgen zııandy qalpyna keltirý máselesine kóńil bólýimiz kerek - Joǵarǵy sot tóraǵasy
ALMATY. Aqpannyń 8-i. QazAqparat /Erlik Erjanuly/ - Qylmystyq áreketten bolǵan shyǵyndardyń bárin bir topqa, bir qorǵa jınaý kerek.
Bul búgin Almatyda ótip jatqan "Qazaqstan Respýblıkasynyń qylmystyq saıasaty: jaı-kúıi jáne ony lıberalızatsııalaýdyń negizgi baǵyttary" dep atalatyn dóńgelek ústel jıynynda aıtyldy, dep habarlaıdy QazAqparat.
"Biz sottalýshyny bas bostandyǵynan aıyryp qamap jiberemiz de, jábirlenýshiniń máselesi sol boıynsha ashyq qalady. Urlanǵan múlki ornyna kelmese, odan ne paıda? Bul másele qarashanyń 18-inde ótken 5-shi sezde de aıtyldy. Biz endi qylmystyq áreketten kelgen zııandy qalpyna keltirý máselesine kóńil bólýimiz kerek. Óıtkeni, memleket barlyq azamattardyń quqyǵyn qorǵaýǵa kepildik beredi. Qylmysker sol kepildikti buzyp otyr. Osyndaı jaǵdaıda birinshi kelgen zııandy qalpyna keltirip, odan keıin qylmys jasaǵan adamdy jazalaý kerek. Bul jóninde kóptegen usynystar bar", deıdi Joǵarǵy sot tóraǵasy Musabek Álimbekov. Jalpy qylmys jasaǵan azamattardyń múlikteri tárkilenip, olardan túrli aıyppuldar óndiriledi. Búgingi kúni bul qarajattardyń bári memleket bıýdjetine ketedi. Musabek Turǵynbekulynyń aıtýynsha, ol salyq bolmaǵandyqtan qazir mynandaı usynystar bar. Máselen, qylmystyq áreketten bolǵan shyǵyndardyń bárin bir topqa, bir qorǵa jınaý. Sondaı-aq japa shekken adamnyń shyǵynyn qordan ótep berip, qylmyskerge bul shyǵyndy qorǵa tóletý kerek.
