Qylmysty jasyrý tótenshe oqıǵa retinde baǵalanýy shart - Bas prokýrordyń orynbasary N. Isaev
ASTANA. 19 qazan. QazAqparat - Qylmysty jasyryp qalý qatań qýdalanyp, tótenshe oqıǵa retinde baǵalanýy kerek.
Bul týraly búgin Parlament Senatynda «Qylmystardyń aldyn alý jáne quqyq buzýshylyqtar profılaktıkasy: qazirgi jaı-kúıi jáne jetildirý perspektıvalary» taqyrybyna arnalǵan konferentsııa barysynda Bas prokýrordyń orynbasary Nurmuhanbet Isaev málim etti.
«Qylmystardyń aldyn alý týrly aıtpas buryn, biz osy qylmystar týraly shyndyqty tolyq bilýimiz kerek. Ókinishke qaraı, dál osy problemany sheshýge umtylystyń barlyǵy medıtsına tilimen aıtqanda «jalǵan dıagnozǵa» negizdelip keldi. Rasynda, quqyq qorǵaý organdary qylmystarmen kúreste kóńilge jaǵymdy «kartına» qalyptastyrýǵa umtylyp, kóptegen jyldar boıy qylmystyń neshe túrlerin jasyrýmen keldi jáne jaǵdaıdy múldem basqasha kórsetýge tyrysty. Soǵan qaramastan biz sizdermen birge profılaktıkanyń tıimdi júıesin qurýǵa tyrysyp kelemiz. Aldyn alý sharalarynyń álgindeı tásiliniń túkke paıdasyz bolǵanyn ańǵarý qıyn emes, kerisinshe biz ondaı «aýrýdyń» tolyq «tarıhy» týraly aqparattan qur qalyp keldik», ‑ dedi N. Isaev.
Onyń aıtýynsha, sońǵy eki jylda qylmystyń obektıvti jaǵdaıyn naqty qalyptastyrý sharalar júzege asyp keledi. Sondyqtan da qylmystyń shynaıy sebepterin saraptaý arqyly jekelegen qylmys túrleriniń oryn alýyn aıqyndaýǵa bolady. «Tek sebepterin aıqyndap qana qoımaı, boljamdar jasap, jalpy memlekettik jáne óńiraralyq tıimdi sharalardyń baǵdarlamalaryn ázirleýge de bolady», ‑ dedi Bas prokýrordyń orynbasary.
