Qylmyskerlerdi ustaý kezinde polıtsııa leıtenanty jaraqat aldy - Pavlodar oblysy
ASTANA. QazAqparat - Pavlodar oblysynda qylmyskerlerdi ustaý barysynda polıtsııa leıtananty jaraqattandy. Ustalǵan úsh kúdiktiniń kisi óltirý men zorlaý qylmysyna qatysy bary anyqtalyp otyr, dep habarlaıdy «QazAqparat» Pavlodar oblysynyń ІІD baspasóz qyzmetine silteme jasap.
Quzyrly vedomstvonyń habarlaýynsha, 15 jeltoqsan kúni Aqtoǵaı aýdanynyń polıtsııa bólimshesine 62 jastaǵy aýyl turǵyny qońyraý shalyp, belgisiz adamdar uıaly telefon satamyz degen syltaýmen úıge kirip alǵanyn aıtqan. Qaraqshylar úıdiń otaǵasyn pyshaqpen qorqytyp, úıden 35 myń teńgeni alyp ketken.
Qylmyskerlerdi izdestirý jumystary birden qolǵa alynǵan.
«Aýdan ortalyǵynda izdeý jumystaryn júrgizý barysynda polıtsııa ınspektory Muhamedǵaly Ahmetov pen jergilikti polıtsııa qyzmetiniń ınspektory Erbolat Átehan izdeýdegi adamdarǵa uqsas eki kúdiktini baıqap qalǵan. Ustaý kezinde olardyń biri qashyp ketpek bolyp, polıtsııa leıtenanty Erbolat Átehandy jaralaǵan. Alaıda quqyq qorǵaýshylar olardy báribir qolǵa túsirdi. Dál osy kúni úshinshi kúdikti de ustaldy», - delingen habarlamada.
Budan keıingi tergeý amaldarynyń nátıjesinde, olardyń eki aýyr qylmysqa qatysy bary anyqtalǵan. Pavlodar oblystyq ІІD baspasóz qyzmetiniń aqparatyna sensek, buryn atalǵan kúdiktiler Pavlodar qalasynda jaldamaly páterde 25 jastaǵy áıeldi zorlaǵan. Budan keıin «VAZ-2110» avtokóliginiń ıesimen kelisip, Naberejnoe aýylyna jetkennen keıin júrgizýshini qylqyndyryp óltirip, denesin ormanǵa laqtyryp ketken.
Qazirgi ýaqytta kúdiktilerge qatysty QR QK-niń 99,120,192 jáne 380 baby boıynsha sotqa deıingi tergeý amaldary júrgizilip jatyr. Olar atalǵan qylmystarǵa baılanysty kináli dep tanylsa, 20 jylǵa deıin bas bostandyqtarynan aıyrylýy múmkin.
