Qylmyskerler jalǵan aqshany qalaı jasaıdy

ASTANA. QazAqparat - QR Qarjy mınıstrligi Memlekettik kirister komıtetiniń mamandary qylmyskerlerdiń jalǵan aqshany qalaı jasaıtynyn aıtyp berdi, dep xabarlaıdy QazAqparat tilshisi.

Profılaktıkalyq jumys jáne baqylaý basqarmasy basshysy orynbasarynyń mindetin atqarýshy Erden Jumanyń aıtýynsha, jalǵan aqshada arnaıy qorǵanys elementteri de bolady. Alaıda onyń qoldan jasalǵanyn birden anyqtaý qıyn. «Biz keıde «sý tańbasy» bar bolsa, durys aqsha dep oılaımyz ǵoı. Mysaly, men óz kózimen kórdim. 10 000 teńgelik kýpıýranyń arnaıy belgisi boldy. Іshinde «sý tańbasy» bar, biraq anyq emes. Al ondaı aqshanyń birden jalǵan ekenin anyqtaý qıyn», - dedi E.Juma Astanada ótken baspasóz máslıxatynda.

Onyń sózine qaraǵanda, qylmyskerler jalǵan aqshany jasaýdyń san alýan ádis-tásilderin qoldanady. «Mysaly, jalǵan kýpıýrany tolyǵymen prınterden shyǵarýy múmkin. Bolmasa, jartylaı kesedi de, bir kýpıýra jasaıdy. Sonda bir jartysy - durys aqsha, ekinshisi qoldan jasalǵan. Ekeýiniń arasyn ádemilep turyp jabystyrady da, adamǵa durys jaǵymen beredi. Qolǵa ustaǵanda jalǵan aqsha ekenin bilinbeıdi. Eki jartyny arnaıy lentamen de, skotchpen de bildirtpeı jabystyrady. Keı kezde ondaı aqsha telefon jáne taǵy basqa qyzmetterdi tólegende termınaldardan da ótip ketedi. Sondyqtan barynsha abaı bolý qajet. Ásirese, túngi ýaqytta aqshany tekserip otyrǵan jón», - dep atap kórsetti E.Juma.

Aıta keteıik, baspasóz máslıxatynda Erden jalǵan aqshany qaı kýpıýramen jıi jasaıtynyn da aıtyp berdi.