Qylmyskerler sotta 11 jastaǵy oqýshynyń múrdesin bólshektemek bolǵanyn aıtty
QASKELEŃ. QazAqparat - 11 jastaǵy oqýshy Órken Azamatulynyń múrdesin qylmyskerler qalaı jasyrmaq bolǵanyn sotta aıyptalýshynyń biri Qadyrjan Gýlıamov aıtyp berdi, dep habarlaıdy QazAqparat tilshisi sot zalynan.
Gýlıamov sot zalynda Shárıpa Aqberdıevanyń enesi men kúıeýin jamandap, ógeı balasyn óltirý týraly oı aıtqanyn jetkizdi. Kúdiktiniń aıtýynsha, olar balany aldap, Aqsaıdaǵy saıajaılardyń birine alyp kelgen. Gýlıamov balanyń arqa tusynan kelip, aýzyn japqan. Temir Aqberdıev aldynan kelip, ony tunshyqtyrǵan. Shárıpa balanyń múrdesinen qutylýdyń birneshe jolyn aıtqan, sonyń ishinde balany múshelep, bólshektep tastaýdy usynǵan.
Aıta keteıik, tergeý amaldary kezinde Aqberdıeva Qadyrjan Gýlıamovqa eshqandaı tapsyrys bermegenin, onyń dálelderi jalǵan ekenin aıtyp kelgen.
Eske sala keteıik, Qaskeleńde 11 jastaǵy Órken Azamatulynyń ólimine qatysty basty sot talqylaýy ótip jatyr.
Kúdikti retinde onyń ógeı sheshesi Shárıpa Aqberdıeva, onyń balalary Temir men Aıdana jáne Temirdiń aǵaıyny Qadyrjan Gýlıamov jáne iske qatysty Rýslan Mýtalıev ustalǵan.
Buǵan deıin habarlanǵandaı, Almaty mektepteriniń birinen Órken Azamatulynyń joǵalǵany týraly aqparat 2017 jyldyń 19 qańtaryna taraǵan. Keıin balanyń múrdesi tabylǵan.
Shárıpa Aqberdıeva men Temir Aqberdıev QR QK-niń 99-baby, 2-bóligi, 3,7,14 tarmaqtary (uıymdasqan túrde kisi óltirý) jáne 132-bap (Kámeletke tolmaǵandy qylmystyq iske tartý) boıynsha aıyptalyp otyr.
Qadyrjan Gýlıamov 99-baptyń 2-bóligi 3,7,14 tarmaqtary boıynsha jáne 125-baptyń 2-bóligi, 1,5 (uıymdasqan túrde adam urlaý) tarmaqtary boıynsha, al Aıdana Aqberdıeva men Rýslan Mýtalıevke atalǵan qylmystardyń jasalýyna kómek kórsetkeni úshin 99-baptyń 2-bóligi, 3, 7, 14-tarmaqtary jáne QR QK 125-babynyń 2-bóligi, 1,5 tarmaqtary boıynsha is qozǵalǵan.
