Qylmyskerler qolynan qaza tapqan maıordyń otbasyna barynsha kómektesemiz - Qorǵanys mınıstrligi

ASTANA. QazAqparat - Áskerı adamdardyń boıynda qatty damyǵan minezdiń biri - qorǵaý ınstınkty. Jedel áreket etken kezde olar óziniń ómirine tónip turǵan qaýipti nazarǵa ilmeıdi de. Ókinishke qaraı, sondaı erdiń biri - Qorǵanys mınıstrliginiń maıory Asqar Qylyshev 21 mamyrdyń túninde Almatyda eki boıjetkendi qarashqylardan qorǵaımyn dep, oqqa ushty. Keshe jaqyndary marqumdy aqtyq saparǵa shyǵaryp saldy.

«Maıor is-saparda júrgen edi. Qaıǵyly oqıǵa áskerı bólimde emes, qalada boldy. Qyzmet ýaqyty bitken soń, marqum Almatydaǵy anasyna jol tartqan. Jol-jónekeı taksı toqtatyp turǵan maıor eki boıjetkenge eki er adamnyń tısip jatqanyn kóredi. Boıjetkenderdi qorǵaǵan maıorǵa qaraqshylar oq atqan. Asqar Qylyshev oqıǵa ornynda qaza tapty», - dedi QazAqparat tilshisine mán-jaıdy túsindirgen QR Qorǵanys mınıstrligi baspasóz qyzmetiniń jetekshisi Janar Kolbachaeva.

J.Kolbachaevanyń aıtýynsha, Almaty qalasynyń Іshki ister departamenti osy iske qatysty tergeý júrgizip jatyr. Eki kúdikti adam qolǵa túsken. Al, Qorǵanys mınıstrligi qaısar maıordyń otbasyna qoldan kelgen kómek kórsetedi.

«Maıordyń otbasyna tıisti kómek kórsetip jatyrmyz. Keshe marqum jer qoınyna tapsyryldy. Biz qoldan kelgen kómekti aıamaımyz, materıaldyq turǵydan da kómek beremiz», - dedi Qorǵanys mınıstrliginiń baspasóz hatshysy.

Asqar Qylyshevtiń ishi men moınyna oq tıgen. jaraqaty óte aýyr ol tilge kelmesten kóz jumǵan. Marqumnyń artynda jary, eki qyzy men bir uly qaldy.