Qylmyskerdiń qolynan qaza tapqan polıtsııa kapıtanynyń qurmetine jarys ótti
TALDYQORǴAN. QazAqparat - Taldyqorǵan qalasynda «Arlan» arnaıy bólimshesiniń polıtsııa kapıtany Erjan Ahmetovtyń qurmetine sambodan týrnır ótti. Eske salaıyq, polıtsııa kapıtany 2013 jyldyń maýsymynda qarýly qylmyskerdiń qolynan qaza tapty, dep habarlaıdy QazAqparat tilshisi.
Oblystyq «Arlan» arnaıy bólimshesi uıymdastyrǵan týrnırge oblystyq, qalalyq, aýdandyq polıtsııa bólimsheleriniń atynan 20 top qatysty. Jalpy komandalyq esepte birinshi oryndy AJQJ-nyń sarbazdarynan qurylǵan komanda ıelendi. Ekinshi jáne úshinshi oryndy Kúzet qyzmeti basqarmasynyń jáne Qylmystyq-atqarý júıesiniń oblystyq departamentiniń ókilderi ózara bólisti. Saıysqa qatysýshylarǵa erlikpen qaza bolǵan «Aıbyn» ordeniniń ıegeri Erjan Ahmetovtyń sýreti beınelengen arnaıy medaldar men kýboktar tapsyryldy.
Sporttyq sharaǵa qurmetti qonaqtar retinde E. Ahmetovtyń týystary, sonymen qatar polıtsııa qyzmetkeri bolyp keletin onyń áıeli jáne týǵan baýyry Serjan da qatysty.
«Baýyrymdy eske alyp uıymdastyrylǵan týrnır bizdiń otbasymyz úshin erekshe. Sambo saıysynda jınaqtaǵan tájirıbe keıinirek polıtsııa qyzmetkerlerine qyzmettik boryshyn óteýde qylmyskerlermen kúreste kómek bolar dep senemin», - deıdi Serjan Ahmetov.
Aıta keteıik, polıtsııa qyzmetkerlerin daıyndaýda sambo sportyna erekshe kóńil bólinedi. Osyǵan baılanysty týrnırge qatysýshylar ózderiniń sheberlikterin jaqsy qyrynan kórsetti. Eń tartysty saıys 74 keli jáne 90 keli salmaq dárejesinde boldy.
