Qylmyskerdi ustaýǵa barǵanda boıymda erekshe kúsh paıda bolady - Túrkistandyq polıtseı

Búginde Jetisaı aýdandyq Polıtsııa bóliminiń bastyǵy qyzmetin atqaryp júrgen  polıtsııa polkovnıgi qyzmetin 1996 jyly jedel ýákil bolýdan bastaǵan. Polıtsııa qyzmetkeri óziniń alǵash qylmyskerdi ustaǵan kezin eske aldy.

«Jetisaı aýdanyndaǵy bazarlardyń biri tonalyp, maǵan kúdiktini tabý mindetteldi. Jan-jaqtan surastyra kele men seziktiniń Ózbekstan Respýblıkasynyń azamaty ekenin anyqtadym. Ony ustaýǵa kishi jedel ýákil ekeýmiz attanyp, onyń bir dámhanada otyrǵanyn bildik. Sol jerge baryp qarasaq,  qylmysker tapshanda tamaqtanyp otyr eken. Baryp ustamaq bolǵanda ol ornynan yrshyp turady, qarasam boıy eki metr deneli  kelgen er adam bolyp shyqty. Bizdi kóre sala ol qorǵandy asyp ótip, kórshi úıge sekirip ketti. Biz izine tústik, sóıtip júrip tórt úıden asyp óttik. Biraq men onyń úlkendigine qaramastan qýyp jetip, qolǵa túsirdim. Ony tipti qulatyp, kómekshim kelgenshe qolyna kisen de salǵanmyn. Aıtqym kelgeni ondaı kezde bizge qudaıdyń ózi kúsh-qýat beredi. Qylmysker boıshań  nemese iri deneli bolsa da qolǵa túsedi»,- deıdi Ermahan Ábdramanov.

Polıtseıdiń aıtýynsha, qyzmet barysynda ártúrli jaǵdaılar kezdesedi. Keıbir qylmyskerler ákki bolady. Ózderin ustatpaýǵa tyrysady. Túbinde ustalmaımyn deıtinderi de bar. Sondyqtan tártip saqshysy zaman aǵymyna qaraı ózin damytyp, jan-jaqty bolýy kerek.
 

«Áıtpese sen qylmyskerdi ustaı almaısyń. Qyzmet barysynda  sondaı-aq, aýyr jaǵdaılardy bastan ótkeresiń. Ol oqıǵalardy ózińnen ótkizip, jábirlenýshilerge qatty janyń ashıtyn kezder bolady. Biraq qashanda sabyrlylyq saqtap, qylmysty ashýǵa baryńdy salasyń. Taǵy bir esimde qalǵan jáıt, Shymkent qalasynda 7 jastaǵy qyzdy belgisiz bireý úıinde zorlap, qashyp ketken. Oqıǵa ornyna baryp kórsek qyzdy aýrýhanaǵa alyp ketipti. Jansaqtaý bólimine jatqyzylǵan jetkinshekke baryp qarasam, jaǵdaıy tym aýyr eken. Onyń jaǵdaıyn kórgende qatty janym ashydy, júregim aýyrdy. Sol jaǵdaıyna qaramastan ol pedofıldiń túr álpeti qandaı ekenin sýrettep aıtyp berdi.

Aıtýynsha, syrtta  oınap júrgende sý suraǵan. Sonda úıge kirip sý alyp bergen kezde kúdikti izinshe  ishke kirip, aıaýsyz zorlyq áreketterin jasaǵan. Sonan soń qalaı da  kúdiktini tabamyn dep izdestirýge kiristim. Buryn sottalǵandardy, nashaqorlardy, esepte turǵan azamattardy taýyp sóılestim. Basqa da aqparat kózderin surastyrdym. Aqyry seziktiniń jeke tulǵasyn anyqtadym. Ol buryn sottalmaǵan, kórshiles Jambyl oblysynyń turǵyny ekeni belgili boldy. Teksere kele onyń osy jastar shamasyndaǵy taǵy eki qyzdy zorlap qashyp júrgeni anyqtaldy. Sýretin jábirlenýshige kórsetip em, birden tanydy.
 

Osydan keıin seziktini kúndiz-túni  izdestire bastadym. Kún demeı, tún demeı jertólelerdy qarastyrdym, bolýy múmkin degen jerlerdi erinbeı qarap shyqtym. Eńbegim esh ketpedi. Araǵa on kún salyp, onyń Shymkent qalasyndaǵy bir mazarda júrgenin anyqtadym. Bizge habarlaǵan adam menimen birge ony ustaýǵa mazarǵa barady. Surastyra kelgenimizde onyń sol jerde máıitterdi jerleýge kómektesip, aqsha taýyp júrgeni belgili boldy. Ustaýǵa baryp, aqyry qylmyskerge qolǵa túsirdik. Eki qolyna kisen salyp, kólikke otyrǵyzdyq. Jaýap alý barysynda ol jasaǵan úsh qylmysyn da moıyndady, 20 jyldan astam ýaqytqa sottaldy»,- deıdi Jetisaı aýdandyq polıtsııa bóliminiń bastyǵy. 

Bas-aıaǵy 20 jyldan astam tájirıbesi bar polıtsııa polkovnıgi qylmyskerlerdi ustaý úshin tártip saqshysynyń bilimi men biliktiligi shyńdalǵan bolýy kerek dep esepteıdi. Sondaı-aq, halyqqa etene jaqyn, adamgershilik qasıeti mol bolýy qajet degendi aıtady. Jurttyń muń-muqtajyn tyńdap, soǵan kómektese alýy kerek degen pikirde.
  

«Qylmyskerdi ustaýyn ustaısyń-aý, alaıda onyń kinásin dáleldep shyǵý da óz aldyna eleýli eńbek. Eń usaq dálelderdiń ózin birtindep jınap, shydamdylyqpen asa sabyrlylyqpen quraısyń. Al mundaı árekettiń bir kúndik jumys emes ekenin ózderińiz de jaqsy bilesizder. Jáne de polıtsııa jumysyndaǵy eń basty aıta ketetin jaıt, nátıjeniń biri, ádildik ornap, kinálilerdiń kinásine saı jazalanýy»,- deıdi bólim bastyǵy.

Búginde 200-ge tarta tártip saqshysy bar aýdandyq polıtsııa bóliminde basshylyq qyzmet atqaratyn Ermahan Abramanov kez-kelgen mamandyqtyń óz qıyndyǵy bar ekenin aıtady. Al, polıtsııa qyzmetinde  basshy bolý úlken  jaýapkershilik.
 

«Basshy bolý men úshin bul ataq abyroı emes. Iyǵyńa artylǵan úlken jaýapkershilik, senim. Qanshama taǵdyrlarǵa qatysty sheshim qabyldaý kerek kezder bolady. Mundaı ýaqytta men sol jáıtti múmkindiginshe taldap, saralap sheshim qabyldaýǵa tyrysamyn. Ol úshin kóp jyldyq tájirıbem kómegin tıgizedi. Basshy ekenmin dep ózimdi joǵary ustamaı, neǵurlym halyqqa etene jaqyn bolýǵa barymdy salamyn.  Tikeleı ahýaldy baıqap, soǵan qaraı jumysty uıymdastyra bilý kerek dep esepteımin. Jeke quramdy soǵan jumyldyryp, baǵyttaýǵa áreket etemin. Óıtkeni halyq polıtsııadan qorqyp emes, kómek alýǵa keletindeı  jaǵdaı jasaý kerek»,- deıdi Ermahan Ábdramanov.

Polıtsııa bólimi basshysynyń sózinshe, búginginiń tártip saqshylary óz jumysyna berilgen. Tipti januıasyna kóńil bólýge qoldary tımeı, ýaqytynyń basym bóligin jumysyna  arnaıdy. 
 

«Tańǵy saǵat altydan túngi on bir nemese on ekige deıin jumysta júretin kezderimiz bolady. Ondaı kezderi balalaryńdy tek uıyqtap jatqan sátin kóresiń.  Balalarym keıde rejıdi, ýaqyt bólmeısiz dep. Biraq men múmkindiginshe bos ýaqytymdy otbasymda ótkizip, mektepterindegi  muǵalimderimen sóılesýge de tyrysamyn. Sodan demalatyn kezderim bolady. Degenmen óz ómirimde  osy mamandyqty tańdadym dep ókingen emespin. Óıtkeni  men bul mamandyqty júrek qalaýymen tańdaǵanmyn. Bolashaqta perzentterim de polıtsııa qyzmetkeri bolǵanyn qalar edim. Al, áriptesterime aıtarym, syn bar jerde durys jumys júredi. Sol synnan nátıje shyǵaryp jumys isteý kerek. Árbir polıtseıde Otanǵa degen súıispenshilik mol bolsa,  halyq arasynda da bizdiń mamandyq týraly jaqsy pikir qalyptasady»,- deıdi polıtsııa polkovnıgi Ermahan Abdramanov.