Qylmyskerdi quryqtaý kezinde polıtseılerde beıne tirkegishter bolýy kerek - QR Bas prokýratýra

ASTANA. QazAqparat - QR Bas prokýratýrasy kúdiktini quryqtaý men esirtkini, qarýdy nemese aqshany tárkileý barysynda tergeý organdaryna beıne túsirilim júrgizetin tirkegishterdi ózimen birge alyp júrýdi mindetteýdi usyndy. Bul jaıynda búgin vedomstvonyń alqa májilisinde QR Bas prokýrorynyń orynbasary Erlik Kenenbaev aıtty, dep habarlaıdy QazAqparat.

«Qyzmetkerler adamdardy ustaý kezinde, esirtki men qarýdy nemese aqshany tárkileý barysynda ózderimen birge beıne túsirilim jasaıtyn tirkegishterdi alyp júrýi kerek. Bul óz kezeginde tártiptiń bolýyn retteıdi. Barlyq oqıǵa taspaǵa basylyp jatqanyn eskere otyryp, kez kelgen quqyq buzýshylyqqa jol berilmeıdi. Osy zamanaýı tehnologııalar damyǵan elderde árbir qyzmetkerdiń is-qımylyn kórsetedi», - dedi ol.

Onyń sózine qaraǵanda, bul turǵyda tergeý amaldarynyń elektrondy formatyna kóshý qajet.

«Onlaın rejimde elektrondy qylmystyq is kez kelgen zań buzýshylyqty anyqtaýǵa múmkindik beredi. Osyndaı isterdi seıfke tyǵyp tastaýǵa múmkin emes. Barlyǵy ashyq ári naqty túrde iske asyrylady. Usynystar kóptep túsýde. Qazirgi kezde bul jumystardy arnaıy qurylǵan top pysyqtap jatyr. Sáýir aıynda zańnamalyq túzetýlerdiń birinshi paketin usynamyz»,-dep naqtylady Kenenbaev.