Qylmysker ózgeniń saýsaq izin, onyń qolyn kesip alǵanda ǵana paıdalana alady - ІІM jaýaby
ASTANA. QazAqparat - Aldaǵy jyldary jeke kýáliktiń artqy jaǵyndaǵy elektrondy chıpke Qazaqstan azamatynyń daktıloskoptyq málimetteri, ıaǵnı saýsaq izderi de engiziledi.
Atalǵan jumysty kezeń-kezeńimen júrgizý kózdelgen. Sóıtip, birneshe jyldan keıin barlyq kýálikterdi tolyǵymen aıyrbastaý josparlanyp otyr, dep habarlaıdy QazAqparat tilshisi.
QR Іshki ister mınıstrligi kóshi-qon polıtsııasy departamentiniń bastyǵy Serik Saıynov búgin Ortalyq kommýnıkatsııalar qyzmetinde ótken baspasóz máslıhatynda atap ótkendeı, osy ýaqytqa deıin jeke kýálik alǵan azamattarǵa qujat merzimi aıaqtalǵansha júre berýine bolady. Al 2021 jyldan bastap barlyq kýálikterdiń chıptaryna daktıloskoptyq málimetter engiziledi.
«Bári ádettegideı júrgiziledi. Jeke kýálik alatyn adam Halyqqa qyzmet kórsetý ortalyǵyna baryp, tapsyrys beredi. Biraq burynǵy protsedýralarmen birge ol sensorlyq qurylǵylarǵa saýsaǵyn basyp, daktıloskoptyq málimetterdi qaldyratyn bolady. Budan bólek, Qazaqstanǵa keletin shetel azamattary da vıza alǵanda osy ispetti derekterdi tapsyrady», - dedi S.Saınov.
Onyń aıtýynsha, búginde osy saladaǵy zańnamaǵa ózgeristermen tolyqtyrýlar engizý máselesi jan-jaqty talqylandy. Jaqyn arada tıisti zań jobasyn Úkimettiń qaraýyna engizý kózdelip otyr. Jalpy, daktıloskoptyq jáne genomdyq tirkeý sharalaryna el bıýdjetinen 24 mlrd. teńge bólinbekshi.
«Negizi, búginde ondaı júıeni damyǵan memleketterdiń basym bóligi keńinen qoldanyp keledi. Onyń bir artyqshylyǵy, adamnyń kýáligi bolmasa da, saýsaqtyń izimen bankterdiń sondaı-aq, memorgandardyń qyzmetin alýǵa bolady», - deıdi ol.
Osy oraıda, jýrnalısterdiń biri qoıǵan: «Al qylmyskerler adamnyń saýsaq izin qoldanyp, nesıe alyp júrmeı me?», - degen suraqqa: «Siz sheteldik fılmderdi kóp kórgen shyǵarsyz. Bizde saýsaq izderiniń elektrondy nusqasy saqtalady. Endi, osy ýaqytqa deıin daktokartany paıdalanyp, qylmys jasady degendi estigen emespin. Árbir adamnyń saýsaq izderi ózgeshe bolyp keledi. Onyń 6-dan 200-ge deıin ózindik erekshelikteri bar. Sondyqtan ony bank operatsııalaryn jasaý úshin paıdalaný múmkin emes. Bul jerde saýsaqtyń ózi kerek. Fılmderde kórgen shyǵarsyz, bankke ótý úshin adamnyń qolyn kesip alady ǵoı (kúldi)», - dep jaýap berdi departament bastyǵy.
Arman Asqarov
