Qylmys jasap qamaýda otyrǵan azamattardy óz erkimen bosatqan tártip saqshysynyń ózi qamaýǵa alyndy
ASTANA. Mamyrdyń 18-i. QazAqparat /Aıdar Ospanalıev/ - Ońtústik Qazaqstan oblysynda polıtsııa qyzmetkeri qylmys jasaǵany úshin kúdikti retinde qamaýda otyrǵan eki azamatpen ishimdik iship, artynan olardy bosatyp jibergen,
dep habarlaıdy QazAqparat.
Bas prokýratýra taratqan málimetterge qaraǵanda, Ońtústik Qazaqstan oblysyna qarasty Maqtaaral aýdandyq Іshki ister bóliminiń 2-shi polıtsııa bólimshesiniń ýaqytsha ustaý abaqtysynyń qyzmetkeri serjant Bákir Joraev qyzmet ókilettigin asyra paıdalana otyryp, abaqtyda otyrǵan Erjan Ótebaevpen jáne Ómirhan Beısekovpen birge abaqtyda spırtti ishimdik ishken. Budan soń ishimdikke ábden masaıǵan tártip saqshysy eki aıyptalýshyny olardyń isteri boıynsha tergeý jumystarynyń aıaqtalmaǵandyǵyna qaramastan abaqtydan bosatyp jibergen. Bunysymen qoımaı, ol ózi bosatyp jibergen azamattardan 2 myń AQSh dollaryn alyp kelýdi talap etken.
Qashqyndardyń biri Ó.Beısekov úıine kelgende ony anasy qaıtadan polıtsııa bólimshesine alyp kelgen. Al E.Ótebaev qamaýdan bosaǵan kúıi qashyp ketken. Alaıda osy oqıǵadan soń birden júrgizilgen jedel-izdestirý jumystarynyń barysynda ol polıtsııa qyzmetkerleriniń qolyna tústi. Qashqynnyń ústinen qylmystyq is qozǵalyp, qazirgi tańda tergeý amaldary júrgizilýde.
Al qamaýda jatqan azamattardy óz erkimen bosatyp jibergen polıtsııa qyzmetkerine qatysty onyń atalǵan qylmysqa qatysy bolýy múmkin degen kúdikpen qylmystyq is qozǵalyp, qamaýǵa alyndy.
