Qylmys jasalmaıtyn aýyldar sany 14-ke jetti – Aqtóbe oblysy
Qylmys múldem jasalmaıtyn aýyldardy oblys ákimdiginiń baspasóz qyzmeti tizip ótti: Yrǵyz aýdanynyń Qurylys, Sheńbertal, Janys bı, Quılys; Alǵa aýdanynyń Amangeldi; Muǵaljar aýdanynyń Bulaqty, Mııalykól; Temir aýdanynyń Tasqopa; Áıteke bı aýdanynyń Aqkól, Aqtasty, Tolybaı, Qaıraqty; Hromtaý aýdanynyń Tassaı aýyly.
«Muǵaljar aýdany Egindibulaq aýyldyq okrýginiń Bulaqty aýylynda búginde 105 úıde 476 turǵyn turady. Aýyl turǵyndarynyń aýyzbirshiligi men quqyq buzýshylyqtyń joqtyǵy kóz qýantady. Bul kórsetkish –Egindibulaq aýyldyq okrýginiń ákimi Álimjan Ańdaqulov pen okrýgtiń ýchaskelik polıtsııa ınspektory Dastan Saqtaǵanovtyń tyńǵylyqty qyzmet etýiniń jemisi.
Egindibulaq aýyldyq okrýgi 1929 jyly ortalyǵy Shıili aýyly №52 jylqy zaýyty bolyp qurylǵan. 1931 jyly ortalyǵy Rodnık eldi mekenine kóshirildi. 1940 jyly asyl tuqymdy jylqy ósirip, tabysqa jetti. 2008 jyly aýyl ataýy Bulaqty bolyp aýysty.
Sońǵy jyldary «Týǵan jerge taǵzym» aktsııasy aıasynda Bulaqty aýylynda birqatar jumystar atqaryldy. Onyń ishinde turǵyndarǵa arnalǵan demalys alańy men Aqtanger júıriktiń eskertkish músini ashyldy. Sonymen qatar Mııalykól aýylyna baılanys munarasy ornatylyp, «Beeline» uıaly baılanys qondyrǵysy qondyryldy. Bulaqty negizgi mektebine kúrdeli jóndeý jumystary júrgizildi. Bulaqty aýylyna medıtsınalyq pýnkt salý josparlanýda», - delingen óńir ákimdiginiń málimetinde.
Budan bólekk, atalǵan aýdanda «Aýyl amanaty» baǵdarlamasy aıasynda 9 joba maquldanǵan. Baǵdarlamanyń negizgi maqsaty — aýyl turǵyndarynyń ál-aýqaty men turmysyn jaqsartý. Aýyldaǵy aǵaıyn qus ósirip, ósimdik egip, shaǵyn bıznes ashyp, tabysqa jetýde.
Aýyldyń aty aıtyp turǵandaı, aınalasy bulaqqa toly mekenniń mańynda ejelgi tarıhı eskertkishter tabylǵan. Búginde Muǵaljar aýdany boıynsha geografııalyq jaǵynan 5 kıeli oryn anyqtalsa, sonyń ekeýi Bulaqty mańynda ornalasqan. Olar —Tóleýbulaq petroglıfteri men Qaraǵul kesenesi. Búginde bul eskertkishter memlekettiń qorǵaýyna alynǵan.
