Qylmys jasaǵany úshin 10 jyl izdestirýde bolǵan 33 jastaǵy Qazaqstan azamaty Mońǵolııadan tabyldy
ASTANA. 2 naýryz. QazAqparat /Jasulan Amanbaıuly/ - Aqmola oblysy turǵynynyń densaýlyǵyna aýyr dárejede zardap keltirdi degen aıyppen Qazaqstanda 10 jyl izdestirýde bolǵan 33 jastaǵy Qazaqstan azamaty Mońǵolııada quryqtaldy.
Bul týraly búgingi baspasóz máslıhatynda QR Іshki ister mınıstrliginiń resmı ókili Qýanyshbek Jumanov habarlady.
«QR ІІM-niń Mońǵolııa Respýblıkasy Baıan Ólgeı qalasynyń quqyq qorǵaý organdary birlesip ótkizgen arnaıy operatsııanyń barysynda Qazaqstan Respýblıkasynyń 33 jastaǵy azamaty Mońǵolııada ustaldy. Ol 2001 jyldyń maýsym aıynda Ereımentaý aýdanynyń Óleńti aýylynda Aqmola oblysy turǵynynyń densaýlyǵyna aýyr dárejede zardap keltirgeni úshin izdestirýde júrgen»,-dedi resmı ókil.
Qazirgi ýaqytta kúdikti Qazaqstanǵa ekstradıtsııalanyp, Shyǵys Qazaqstan oblysynyń tergeý ızolıatoryna qamaýǵa alyndy.
