Qylmys álemimen kúreste polıtseıler álsizdik tanytyp otyr - E. Doshaev
ASTANA. 19 qarasha. QazAqparat - Sońǵy bes jyldaǵy Іshki ister mınıstrliginiń qyzmetin saraptasaq, kórsetkishter bizdiń polıtseılerdiń qylmys álemimen kúreste ázirshe jeńilip jatqandyǵyn kórsetedi.
Búgin Parlament Májilisinde Іshki ister mınıstriniń qatysýymen ótken Úkimet saǵatynda sóz sóılegen depýtat Ergen Doshaev osylaı málim etti.
Sóz arasynda sońǵy bes jyldaǵy faktilerge nazar aýdartqan depýtat, jalpy qylmys kórsetkishiniń sońǵy jyldary ósip otyrǵanyn alǵa tartty. Máselen, eger 2007 jyly elimizde tirkelgen qylmystar 128 myńnan sál assa, aǵymdaǵy jyldyń qarashasynda Qazaqstanda 237 myń qylmystyq áreketter júzege asqan. Sonyń ishinde qylmystyq jaǵdaıdyń kúrt ózgerýi 2011-2012 jyldardyń enshisine tıedi.
«Ádildigi úshin aıta keteıik, kórsetkishterdiń bulaısha qubylýyna eń aldymen Memleket basshysynyń naqty jaǵdaıdy jaba-jasyrmaı, azamattardyń quqyq qorǵaý organdaryna jasaǵan ótinishterin tolyq tirkeý týraly qatań tapsyrmasy aıtarlyqtaı áser etti. Degenmen, osy kezeń ishinde tonaýdyń aıtarlyqtaı óskenin, buzaqylyq faktileriniń eki esege artqanyn, bótenniń múlkin urlaý, onyń ishinde páter urlyǵy kúrt kóbeıgenin aıtpaı qalýǵa esh bolmaıdy», - deıdi Ergen Doshaev.
Budan bólek, depýtat ІІM tergeý organdarynyń jumys sapasyn da synǵa aldy. Onyń aıtýynsha, eger 2007 jyly quqyqqa qaıshy jasalǵan barlyq áreketterdiń 63,64 paıyzy ashylsa, 2012 jyly qylmystardy ashý kórsetkishi 45,6 paıyzǵa áreń jetken. «ıAǵnı, búgingi tańda barlyq qylmystyń jartysynan astamy sol qalpynda ashylmaı qalyp jatyr. Qaraqshylar, baýkespe men urylar erkindikte júr, al jasaǵan qylmysy úshin bultartpaı jazalaý qaǵıdaty tek qaǵaz júzinde ǵana», - dedi ol.
