Qydyryp júre bersek, «qyzyl» aımaqqa kiremiz – Aqtóbeniń bas dárigeri
Aqtóbe oblysynda koronavırýs ınfektsııasynan emdeıtin aýrýhanadaǵy kereýet sany qaıta artty.
«Koronavırýs ınfektsııasyna shaldyqqan adamdar oblystyq ınfektsııalyq aýrýhana men ftızıopýlmonologııalyq ortalyqta em qabyldap jatyr. Aýdandar da em qabyldap jatqan adamdar bar. Buryn 7-8 adam ǵana dáriger kómegine júginse, sońǵy kúnderi 40-qa jýyq adamnan vırýs anyqtala bastady. Aýdandar boıynsha Oıylda 15, Qarǵaly men Hromtaýda 6-7 naýqas bar. Kóbi Aqtóbe qalasynda. Karantın talabyn turǵyndar saqtamaıdy. Naýryz merekesinde karantın shekteýi kúsheıse de, adamdar qonaqqa baryp júr. Maska taqpaıdy, áleýmettik araqashyqtyqty saqtamaıdy», - dedi oblystyq densaýlyq saqtaý basqarmasynyń basshysy Rústem Isaev.
Qazirgi kezde 13 naýqas jansaqtaý bóliminde jatyr. Onyń bireýi ókpeni jasandy jeldetý apparatyna qosylǵan.
«Kóbine 60 jastan asqan adamdarǵa vırýs aýyr tıedi. Jastar — tasymaldaýshy. Sondyqtan egde jastaǵy adamdar toı, sadaqaǵa barmaýy tıis. Dál osy kúıinde qydyryp júre berse , «qyzyl» aımaqqa kiremiz. Ol kezde karantın kúsheıip, blokpostar da qaıta qoıylady. Sheshýshi sátte aqylǵa kelip, úıde otyrǵan abzal», - dedi Rústem Isaev.
Aıta keteıik, buǵan deıin tek pnevmonııaǵa qarsy em júrgizgen oblystyq ftızıopýlmonologııalyq ortalyqta 70 kereýet daıyndalyp, koronavırýs ınfektsııasyna shaldyq naýqastar qabyldana bastady. Sonymen birge 100 kereýetti narkodıspanser de COVID-19 juqtyrǵan naýqastardy emdeýge jumyldyrylady. Al «Shaǵala» saýyqtyrý ortalyǵy karantındik statsıonarǵa aınalady. Rústem Isaevtyń aıtýynsha, dári-dármek jetkilikti.
