Qydyráli men Qaraqat alǵashqy túlekterin shyǵardy

Úsh jyl buryn «Astana» ýnıversıtetiniń qurmetti professory, prodıýser Qydyráli Bolmanov pen Mádenıet qaıratkeri, ánshi Qaraqat Ábildına daryndy balalarǵa arnalǵan eksklıýzıvti mektep-stýdııasynyń negizin qalaǵan bolatyn. Jas jetkinshekter boıyna ulttyq óner arqyly otansúıgishtik pen ulttyń salt-sanasyn, tarıhyn, dástúrin qurmetteý sezimin sińirýdi maqsat tutqan bul mektep, óziniń alǵashqy túlekterin - daryndy 10 jastyń resmı shyǵarylymyn jasady. Osyǵan oraı, Ulttyq baspasóz klýbynda baspasóz máslıhaty ótti.

Dástúrli mýzykalyq ónermen jas urpaqtyń sana-sezimin jetildirý, kemeldendirý - ulttyq tárbıeniń bir kózi. Osy baǵytta jumys jasap kele jatqan mektepte, ásirese, jetigen, qyl-qobyz, dombyra sekildi ulttyq aspaptarǵa erekshe den qoıylǵandyǵyn atap ótken Qaraqat Ábildına «Qaraqat» mektep-stýdııasynyń tujyrymdamasyna toqtaldy.

Onyń aıtýynsha, balalardy jaı oqytyp qana qoımaı, teorııalyq bilim berýmen qatar, ony tájirıbemen negizdep, ushtastyra otyrady. Sonyń jemisi - 50-ge jýyq jas jetkinshek respýblıkalyq jáne halyqaralyq baıqaýlardan oljaly oralǵan. Olardyń ishinde Italııada ótken baıqaýdan 1-júldeli oryndy, «Kınotavrık» sporty men halyqaralyq balalar óneriniń festıvalinen bas júlde alǵan jastar da bar. Jyl saıyn Astana qalasynda mektep-stýdııasynyń oqýshylary birneshe kontsertter uıymdastyryp otyrady.

Sonymen qatar baspasóz-konferentsııasynda otandyq oıynshyqtar shyǵaratyn «Bal-bala» kompanııasynyń jańa ónimderi de tanystyryldy. Ol oıynshyqtardyń arasynda «Qaraqat» qýyrshaǵy, qaýipsiz jáne bala talǵamyna jaýap bere alatyn jumsaq qonjyq pen qabyrǵaǵa da órmelep shyǵyp kete alatyn, pýltpen basqarylatyn kólikter de bar. Qydyráli Bolmanov aldaǵy shyǵarmashylyq josparlary jáne «Bal-balanyń» damý perspektıvalary jaıynda oıymen bólisti.

Aıta keteıik, osy jyldyń 3 maýsymynda L.Gýmılev atyndaǵy Eýrazııa Ulttyq ýnıversıtetiniń kontsert zalynda «Qaraqat» mektep-stýdııasy túlekteriniń saltanatty kontserti uıymdastyrylmaqshy.

Maqala «Aıqyn» gazetiniń búgingi sanynda jaryq kórdi.