Qydyráli Bolmanov pen Qaraqat Ábildına «Qazaqstanda jasalǵan» aktsııasyn qoldady
ASTANA. QazAqparat - Qazaq estradasynyń tanymal juldyzdy juby Qydyráli Bolmanov pen onyń jubaıy Qaraqat Ábildına otandyq oıynshyq óndirýshilerdi qoldaýǵa baǵyttalǵan «Qazaqstanda jasalǵan» aktsııasyn qoldady.
Qydyráli Bolmanov «Bal-bala» balalar oıynshyqtaryn shyǵaratyn alǵashqy qazaqstandyq kompanııanyń avtory jáne basshysy retinde belgili.
«Álemde bizdiń oıynshyqtardyń analogy joq. «Bal-bala - Qazaqstan tarıhyndaǵy alǵashqy brend. Ol Qazaqstanda ǵana emes, álemniń basqa elderinde de tanyla bastady. «Qazaqstanda jasalǵan» aktsııasy qazaqstandyq bıznesti damytýǵa qosymsha múmkindik ashady», - dedi Q. Bolmanov jýrnalısterge bergen suhbatynda.
Eske salsaq, kompanııa Aldar Kóse, Tazsha bala, Er Tóstik sııaqty qazaq folklorynyń keıipkerleriniń de, ómirde bolǵan adamdardyń da prototıpterin oıynshyq jelisinde shyǵarady.
«Bal-bala» oıynshyqtarynyń basty, biregeı erekshelikteri olardyń qazaqstandyq naryqqa beıimdelýi. Oıynshyqtar bı bıleıdi, án aıtady, qazaq tilinde sóıleıdi. Qazir jelide 17 ataý bar, onyń 11-i jumsaq oıynshyqtar.
«Qazaqstanda jasalǵan» aktsııasyn iske qosý ıdeıasy alǵash ret Úkimettiń keńeıtilgen otyrysynda aıtylǵan, QR Prezıdenti N. Nazarbaev qazaqstandyqtardy otandyq ónimdi satyp alýǵa shaqyrdy.
