Kvota bólindi eken dep áıelderdiń bári saıasatqa bet burmaıdy – sarapshy

NUR-SULTAN. QazAqparat – Sailau Talks-2021 sharasynda sarapshylar alǵash ret partııalyq saılaý tizimine áıelder men jastarǵa 30%-dyq mindetti kvota qaralǵanyna jáne áıelderdiń saıası protsesterge qatysýyna qatysty pikir bildirdi, dep habarlaıdy QazAqparat tilshisi.

«Elimizdegi halyqtyń 51% – áıelder bolsa, 21% – jastar. Saılaý nátıjesi shyqqannan keıin partııa áıelder men balalardyń múddesin qorǵaıtyn ókilderdi tanystyratyn bolady dep oılaımyn. Memleket basshysy Qasym-Jomart Toqaev 2021 jyldyń basynda saıası reformalardyń ekinshi paketi qabyldanatynyn aıtty. Sol kezde ne bolatynyn kóremiz. Biz aldymen shara qabyldaımyz, sosyn ol qalaı júzege asqanyn baıylaımyz, ıaǵnı evolıýtsııalyq joldy júrip ótemiz. Bul – óte jaqsy sheshim», - deıdi saıasattanýshy Juldyzaı Ysqaqova.

Qazaqstan strategııalyq zertteýler ınstıtýtynyń bólim basshysy Alýa Joldybalınanyń aıtýynsha, 30% kvota bólindi eken dep barlyq áıel saıasatqa júgirmeıdi.

«Keıbir áıel otbasylyq ómirin ǵana tańdasa, endi biri saıasatqa aralasqysy keledi. 30%-dyq kvota – ýaqytsha is-shara shyǵar. Bul – áıelderdiń saıasattaǵy belsendiligin arttyrý sharasy. Kóp memleket osyndaı kvotany ýaqytsha engizip, keıin bas tartady. Jalpy otbasyn da, jumysyn da qatar alyp júrip, barlyǵyna úlgerýge tyrysatyn áıelder bolady. 30% kvotany qoǵamdaǵy ózekti máselelerdi sheshýge áıelderdiń atsalysýynyń bir mehanızmi retinde qaraý kerek», - deıdi ol.