KVI juqtyrǵan naýqastar qalaı emdeledi – Maman túsindirip berdi
NUR-SULTAN. QazAqparat – Nur-Sultan qalasy qoǵamdyq densaýlyq saqtaý basqarmasynyń basshysy Sáýle Qısyqova KVI juqtyrǵan naýqastardyń qalaı emdeletinin túsindirdi, dep habarlaıdy QazAqparat tilshisi.
«Koronavırýs ınfektsııasy anyqtalǵanda azamattardy aýrý belgisi bar jáne joq dep bólemiz. Olar (KVI belgisi joq adamdar – red.) aýrý adam emes, tek osy vırýsty tasymaldaýshy bolyp sanalady. Olardy emdeý qajet emes. Al ekinshi top – aýrý belgisi bar adamdar bizdiń hattamaǵa sáıkes em alady. Ár adam JRVI, tumaý nemese KVI belgisi bar bolsa, mindetti túrde test tapsyrýy qajet», - dedi basqarma basshysy Ortalyq kommýnıkatsııalar qyzmetinde ótken onlaın brıfıngte.
Mamannyń aıtýynsha, KVI anyqtalǵan adamdarǵa dárigerler arnaıy em jazyp beredi. Olar úıde ımmýnıtet kóterip, túrli vıtamınder ishý qajet. Jáne emdi mindetti túrde dárigerdiń keńesine sáıkes alý kerek.
Sonymen birge, QR Densaýlyq saqtaý mınıstriniń zerthanalyq qyzmet boıynsha keńesshisi Janar Súleımenova turǵyndarǵa ózdiginen em-dom jasamaýǵa keńes berdi.
«Árbir patsıent Bastapqy medıtsınalyq-sanıtarlyq kómek kórsetý uıymyna tirkelgen jáne emhanadaǵy mamandar baqylaý júrgizedi. Sondyqtan, úıde em-dom jasamaýǵa keńes beremin. Koronavırýs anyqtalǵan, biraq sımptomy joq adamdar óz jaǵdaıyn baqylap, dene qyzýyn ólsheýi tıis. Entigý, dene qyzýynyń 38 gradýsqa jetýi, álsizdik syndy belgiler baıqalsa, birden jedel jáirdemge habarlasý qajet», - dedi Janar Súleımenova.
Buǵan deıin spıker elordada jedel járdem bazasyndaǵy koll-ortalyqqa júginýshiler sany kúrt óskenin habarlaǵan edi.
Sonymen birge, Nur-Sultanda koronavırýs ınfektsııasyn juqtyrǵandar sany úsh ese artty, 50 naýqas jasandy ókpe jeldetý apparatyna qosylǵan.
