KVI vaktsınatsııasynyń ekinshi kezeńi: 2 myńnan astam aqmolalyq ekpe aldy
KÓKShETAÝ. QazAqparat - Aqmola oblysynyń bas memlekettik sanıtarlyq dárigeri Aınagúl Mýsına óńirde «Spýtnık V «Gam-KOVID-Vak» vaktsınatsııasynyń ekinshi kezeńi qalaı ótip jatqany týraly aıtty, dep habarlaıdy QazAqparat tilshisi.
Onyń aıtýynsha, birinshi aqpannan bastap aımaqta KVI vaktsınatsııasy bastaldy.
«Birinshi kezeńde 1 300 doza vaktsına kelip tústi, birinshi komponentpen 1 298 adam egildi, ekinshi komponentti 1 048 adam aldy, olardyń ishinde 17 muǵalim, 9 memlekettik qyzmetker, 1 100 medıtsına qyzmetkeri. Ekinshi naýryzda taǵy 3 700 doza vaktsına jetkizildi. Ekinshi kezeńde muǵalimder men kúsh qurylymdarynyń qyzmetkerleri vaktsınany alady. Onyń ishinde 638 muǵalim, 318 kúsh qurylymdary men polıtsııa qyzmetkerleri, 59 memlekettik qyzmetshi, 930 medıtsına qyzmetkeri bar», - dep túsindirdi óńirdiń bas sanıtarlyq dárigeri.
Osy rette, oblys boıynsha KVI - ǵa qarsy vaktsınatsııalaýǵa jumyldyrylǵan 24 egý pýnkti daıyndaldy, onyń beseýi Kókshetaý qalasynda.
«Eki komponentti alǵan kezde vaktsınatsııa aıaqtaldy dep sanalady, ımmýnıtet vaktsına engizilgennen keıin 56-shy kúni qalyptasady jáne eki jylǵa saqtalady», - dep tolyqtyrdy Aınagúl Mýsına.
Sondaı-aq, A.Mýsına vaktsına salý tártibi týraly aıtty. Vaktsına birinshi kezeńde juqtyrý qaýpi joǵary adamdar egiledi. Olar medıtsına qyzmetkerleri, mektepter, joǵary oqý oryndarynyń oqytýshylary men orta bilim berý mekemeleriniń pedagogtary, áleýetti qurylymdardyń qyzmetkerleri. Ekinshi kezeńde mektep-ınternat pedagogtary, mektepke deıingi balalar mekemeleri, stýdentter, memlekettik qyzmetkerler, sozylmaly aýrýlary bar adamdar egiledi. Úshinshi kezeńde medıtsınalyq-áleýmettik mekemelerdiń personaly men kontıngenti jáne balalardyń jabyq mekemeleriniń qyzmetkerleri. Tórtinshi kezeń-táýekel tobyndaǵy barlyq qalǵan kontıngent.
«Ázirge ekpe salynǵan adamdardan vaktsınaǵa qolaısyz reaktsııa tirkelgen joq», - dep túıindedi A.Mýsına.
