KVI órshigen kezde medqyzmetkerler 1 mln teńgeden aılyq aldy - Densaýlyq mınıstri
NUR-SULTAN. QazAqparat – Densaýlyq saqtaý mınıstri Alekseı Tsoı pandemııa ýaqytynda medıtsına qyzmetkerleri aıyna shamamen 1 mıllıon teńge aılyq alǵanyn aıtty, dep habarlaıdy QazAqparat tilshisi.
«Bul tólem áli de berilip keledi. ıAǵnı, qaýipti jaǵdaıda jumys istegen medıtsına qyzmetkerleri qosymsha kepildikke ıe bolýy úshin (ınfektsııalyq statsıonarlarda) bir aılyq tólemge 200 myń teńgeden 850 myń teńgege deıin aqsha qosyldy. Máselen Almatydaǵy ınfektsııalyq aýrýhananyń dárigeriniń aılyǵy 250 myń teńge. Álbette bul eń joǵary bolmasa da eń tómen de aılyq dep te aıta almaımyz. Osy sanattaǵy dáriger naýryz aıynan qyrkúıekke deıin 1,7 mln teńge jáne qosymsha 850 myń teńge aldy. Onyń aılyǵy bul kezeńde 7,7 mln teńgege teńesti. ıAǵnı aıyna ol shamamen 1,1 mln teńge alǵan», - dedi Alekseı Tsoı Ortalyq kommýnıkatsııalar qyzmetinde ótken baspasóz máslıhatynda.
Mınıstr sonymen qatar ınfektsııalyq statsıonardaǵy medbıkelerdiń aılyǵy 153 myń teńge bolǵanyn málim etti.
«Atalmysh medbıke qaýipti jaǵdaıda jumys istegendikten qosymsha 850 myń teńgeden aldy. Shamamen osy aralyqta (7 aıda) 7 mıllıon teńge tapty. Bul – qaýipti jaǵdaıdaǵy jumys barysynda berilgen aılyq ekenin eskerý kerek», - dedi ol.
