KVI naýqastaryn qashyqtan baqylaý júıesin oılap tapqan oqýshylar 1 mln teńge aldy
TARAZ. QazAqparat – Jambyl oblysynyń ákimi Berdibek Saparbaev Taraz qalasyndaǵy Nazarbaev Zııatkerlik mektebine baryp, jaǵdaıymen tanysty, dep habarlaıdy QazAqparat tilshisi.
Qazir bilim ordasynda 713 oqýshy bilim alyp júr. Karantınge baılanysty oqytý qashyqtan júrgizilýde. Mektep basshylyǵy Olardyń sabaqqa qatysýyn arnaıy onlaın baǵdarlama arqyly tekserý múmkindigi bar ekenin jetkizdi.
Aımaq basshysyna oqýshylardyń úzdik ǵylymı jobalary usynyldy.
NZM oqýshylary dárigerlerge koronavırýstyq ınfektsııasy bar naýqastyń jaǵdaıyn qashyqtyqtan baqylaýǵa múmkindik beretin arnaıy qural oılap taýypty. Mobıldi qosymsha smartfonǵa ımpýlstik oksımetr arqyly aqparat jiberedi. Dáriger naýqastyń jaǵdaıynyń dınamıkasyn oǵan nemese palataǵa barmaı-aq baqylaı alady. Ónertabystyń múmkindikterin oblystyq densaýlyq saqtaý basqarmasynyń bastyǵy Áset Qalıev synap kórdi.
«Bir aýrýhanaǵa tájirıbe retinde ornatý kerek. Eger oń nátıje berse, basqa da emdeý mekemelerine de engizýge bolady. Ásirese, bul - qazirgi kezde óte qajetti qurylǵy»,- dep atap ótti Berdibek Saparbaev.
Ákim jumysty joǵary baǵalap, onyń avtorlary, 12-synyp oqýshylary Abylaı Sydyqov pen Anelııa Ábdimálikke, bir mıllıon teńgeniń sertıfıkatyn tabystady.
Aımaq basshysynyń nazaryna budan basqa da jas ǵalymdardyń eńbekteri usynyldy.
Oblys ákimi mekteptiń jataqhanasy men kitaphanasyn da aralap kórdi. Keıin aýlada Berdibek Saparbaev kishigirim raketanyń aspanǵa kóterilgenin de kórdi. Aımaq basshysy zııatkerlik mekteptegi oń tájirıbe óńirdiń ózge bilim oshaqtaryna da taraýy kerektigine mán berdi.
