KVI-men aýyryp, jansaqtaý bóliminde jatqandardyń deni elordada turady
NUR-SULTAN. QazAqparat – Koronavırýs indetinen reanımatsııalyq tártipte emdelip jatqandardyń kóbinde basqa da ilespe aýrýlary ýshyǵyp otyr. Bul týraly Densaýlyq saqtaý mınıstri Ajar Ǵınııat málim etti, dep habarlaıdy QazAqparat tilshisi.
«Reanımatsııadaǵy naýqastardyń negizgi kontıngenti – bul ilespe aýrýlary bar 50 jastan asqan adamdar. Patsıentterdiń 24,2 paıyzynda arterııalyq gıpertenzııa, 9,1 paıyzynda ókpeniń sozylmaly obstrýktıvti aýrýy, 6,1 paıyzynda júrektiń ıshemııalyq aýrýy, sondaı-aq 6,1 paıyzynda qant dıabeti jáne taǵy basqa aýrýlary bar», - dedi A. Ǵınııat Ortalyq kommýnıkatsııalar qyzmetinde.
Mınıstrdiń málimetine qaraǵanda, reanımatsııa bólimshelerinde 18 adam jatyr. Olardyń eń kóbi Nur-Sultan qalasynda turady – 11 patsıent. Jambyl oblysynda 1 bala jasandy ókpe ventılıatsııasy apparatyna qosyldy.
«Koronavırýspen aýyrǵan naýqastarǵa ýaqytyly medıtsınalyq kómek kórsetý úshin alǵashqy medıtsınalyq-sanıtarııalyq kómek deńgeıinde 2387 mobıldi brıgada uıymdastyrylǵan. Onyń ishinde aýyldarda 1010 mobıldi brıgada jumysyn jalǵastyryp otyr. 2022 jyldyń birinshi jartyjyldyǵynda mobıldi brıgadalar 815 423 qyzmet kórsetti», - dedi mınıstr.
Budan buryn habarlanǵandaı, álemde syrqattaný deńgeıiniń ósýimen qatar, Qazaqstanda da 20 maýsymnan bastap koronavırýs ınfektsııasyna shaldyǵý deńgeıi ósti.
Sonymen qatar, koronavırýs kóp taralyp jatqan óńirler belgili boldy.
