KVI-men aýyrǵan adamda ózge de vırýstardyń belsendiligi artqan
NUR-SULTAN. QazAqparat - Koronavırýspen aýyrǵan adamdardyń júıke júıesi syr bere bastaǵan. Onyń ústine naýqastardyń 80 paıyzynda D dárýmeni jetispeıdi, dep habarlaıdy «Qazaqstan» Ulttyq telearnasy.
Mamandar júrgizgen taldaý nátıjesinde aǵzadaǵy ózge de vırýstardyń belsendiligi artqan. Ásirese, uıqy bezi, qan qysymy, búırek, asqazan aýrýlary sııaqty naýqasta buryn-sońdy bolmaǵan asqynýlar baıqaldy. Bul nebári 50 adamǵa júrgizilgen taldaýdyń bastapqy nátıjesi. Osy postkovıdtik sındromdy zertteý jobasyn jýyrda ulttyq kardıohırýrgııa ortalyǵynyń mamandary qolǵa alǵan edi.
Postkovıdtik joba arqyly dıagnostıkadan ótip júrgenderdiń biri Aınagúl Júsipova. Koronavırýsty 4 aı buryn juqtyrǵan. Saldaryn áli kórip júr. Vırýstan keıin basqa aýrý túrleri asqynyp ketken. Buryn múlde bolmaǵan qan qysymy jıi kóterilip, júıkesi syr berip, uıqysyzdyq mazalaıdy.
«Koronavırýstan keıin asqazanym aýyrdy. Asqazanymnan keıin davlenııam kóterildi. Keıin qorqynysh stress paıda boldy. Qazir meni mazalaıtyn uıqysyzdyq. Qobaljý. Endi sol aýrýlar boıynsha em qabyldap jatyrmyn», - deıdi qala turǵyny Aınagúl Júsipova.
Jobaǵa qatysýǵa 50-ge jýyq adam nıet bildirgen. Tekserýdiń alǵashqy kezeńiniń nátıjesine sáıkes, denede gerpes, tsıtomegalovırýs, Epshteın Barr vırýstarynyń belsendiligi artqany anyqtaldy. Bul - qan qurylymy men ishki organdardy zaqymdaıtyn zııandy vırýstar. Saldarynan arterııaldy gıpertenzııa, búırek, asqazan-ishek joldarynyń aýrýy, uıqy bezi, sozylmaly aýrýlar asqynǵan. Ásirese, júıke júıesi aýrýlaryna shaǵym kóp.
«Koronavırýsten qorqý, jaǵymsyz jańalyqtardy jaqyn qabyldaý, ólip qalam ba degen ýaıym. Munyń bári mıǵa jınalyp, kóp adamdarda júıke aýrýlary paıda bolǵan. Uıqysyzdyq, sharshaý, streske berilýdiń saldarynan aǵzada ózge aýrýlardyń asqynýy baıqalyp jatyr», - deıdi Ulttyq ǵylymı kardıohırýrgııalyq ortalyǵynyń psıhoterapevti Ǵalııa Muqataeva.
Aýrýy asqynǵan patsıentterdiń eń jasy 30-da. Uıqysyzdyq pen álsizdikke shaǵymdanǵan. Al eń úlkeni 83-tegi qarııa. Ol sozylmaly aýrýy syr bergenin aıtady. Arnaıy jasaqtalǵan dárigerlik quram osy naýqastarǵa tıisti emshara júrgizbek.
«Jobanyń negizgi maqsaty - naýqastardyń densaýlyǵyn ońaltý. Qazir naýqastardan klınıkalyq, bıohımııalyq analızder alyp, qan qurylymyn zerttep, aǵzadaǵy vırýstyń kontsentratsııasyn anyqtap, patogendi florany tekserýdemiz. Sol nátıjeler arqyly indettiń saldaryna zertteý júrgizip, analız jasap, emdeý mehanızmin meńgerýdi kózdeımiz», - deıdi Ulttyq ǵylymı kardıohırýrgııalyq ortalyǵy «Postkovıdtik sındrom» jobasynyń zertteýshi-dárigeri Aınur Táýekelova.
Postkovıdtik sındromdy zertteý shetelde bar tájirıbe. Ǵylymı jobany elordadaǵy ulttyq kardıohırýrgııalyq ortalyǵy da usynyp, birneshe medıtsınalyq mekeme qoldaý tanytqan.
