KVI-ge qarsy vaktsına alǵan 1025 adamda asqyný bolǵan joq - SQO

PETROPAVL. QazAqparat – Soltústik Qazaqstan oblysynda koronavırýsqa qarsy vaktsına alǵan 1025 adamda ekpege qalypty reaktsııa bolǵanymen asqynýlar tirkelgen joq, dep habarlaıdy QazAqparat tilshisi.

Petropavldaǵy № 3 qalalyq emhana bas dárigeriniń orynbasary Sábıra Daıyrovanyń aıtýynsha, ekpe egý pýnktteriniń biri olardyń emdeý mekemesinde ornalasqan. Emhanaǵa vaktsınalaýǵa 230 doza bólingen. Ekpe egý jumystaryn búgin-erteń bitiremiz dep otyr. Bul jerde fıltrde jáne mobıldi top quramynda júrgen óz qyzmetkerleri jáne perınataldyq ortalyq, ftızıopýlmonologııa ortalyǵy, Petropavl qalalyq kópbeıindi aýrýhana mamandary KVI-ge qarsy ekpe alǵan.

«Vaktsınatsııa adamnyń ımmýnıtetin kóterý úshin jasalady. Aǵzany vırýsqa qarsy daıyndaımyz. Alaıda ekpe alǵannan keıin de adam kútinýi tıis, ıaǵnı maska taǵyp, jurt kóp júretin jerlerge barmaý qajet. Araqashyqtyqty mindetti túrde saqtap, qoldy jıi jýyp otyrǵan jón», - deıdi Sábıra Daıyrova.

Sábıra Daıyrova da kóppen birge 2 aqpan kúni koronavırýsqa qarsy vaktsına aldy.

«Alǵan kúni eshqandaı áseri bolǵan joq. Tek úshinshi kúni ǵana álsizdik bolyp, 2-3 saǵattaı túshkirdim. Budan basqa esh ózgeristi baıqamadym. Búgin ekpe alǵanyma segizinshi kún. Jaǵdaıym jaqsy», - deıdi № 3 qalalyq emhana bas dárigeriniń orynbasary Sábıra Daıyrova.

SQO densaýlyq saqtaý basqarmasy baspasóz qyzmetiniń málimetinshe, óńirde 1 aqpannan bastap 1025 adam koronavırýsqa qarsy vaktsına aldy. Olarda alǵashqy kúnderi ekpege aǵzanyń kádimgi áseri, ıaǵnı ıne pisken jerdiń aýyrsynýy, álsizdik bolyp, tek keıbirinde ǵana 37-38 gradýsqa deıin dene qyzýlary kóterilgen. Asqyný jaǵdaılary tirkelgen joq.

Buǵan deıin óńirge Qaraǵandyda shyǵarylǵan vaktsınanyń bir aptadan keıin jetkiziletinin habarlaǵan edik.