KVI-ge qarsy «Komırnatı» vaktsınasynyń 500 myńnan astam dozasy ákelinedi

ASTANA. QazAqparat – QR Densaýlyq saqtaý mınıstrligi Slovakııanyń densaýlyq saqtaý mınıstrligimen «Komırnatı/Omıkron» (Pfaızer) vaktsınasynyń 500 myńnan astam dozasyn óteýsiz negizde jetkizý týraly ýaǵdalastyqqa qol jetkizdi. Bul týraly QazAqparat vedomstvonyń baspasóz qyzmetine silteme jasap habarlaıdy.

Óndirýshiniń nusqaýlaryna sáıkes, «Komırnatı/Omıkron» vaktsınasy buryn KVI-ǵa qarsy vaktsınatsııalaýdyń bastapqy tolyq kýrsyn alǵan 12 jastan asqan adamdardy revaktsınatsııalaý úshin ǵana usynylady. Bul vaktsınany vaktsınatsııalaýdyń tolyq kýrsy úshin qoldanýǵa bolmaıdy.

Vırýstyń aınalymdaǵy jáne únemi ózgerip otyratyn shtamdarynan jaqsy qorǵaýdy qamtamasyz etý maqsatynda vaktsına óndirýshiler vırýstyń shtamdyq quramyna turaqty monıtorıng júrgizedi jáne vaktsınalardyń quramyn jańartý boıynsha sharalar qabyldaıdy.

«Komırnatı/Omıkron» vaktsınasy – koronavırýs shtamynyń jańa nusqalaryn eskere otyryp jańartylǵan jáne quramynda Omicron BA 4 jáne BA.5 sýbvarıanttary bar vaktsına.

Elge kelgennen keıin «Komırnatı/Omıkron» vaktsınasy óńirler boıynsha taratylady jáne koronavırýs ınfektsııasyna qarsy revaktsınatsııalaý úshin qoljetimdi bolady.

Qazirgi ýaqytta Qazaqstan aýmaǵynda vaktsınatsııanyń tolyq kýrsyn alý, sondaı-aq halyqty revaktsınatsııalaý úshin «KazVak» (QR), «Sınofarm» (Qytaı), «Komırnatı» (Pfaızer, AQSh) vaktsınalary bar.

COVID-19 Omıkron shtamy búkil álemde aınalymdaǵy basym nusqa bolyp qala beredi, onyń úlesine Qazaqstan Respýblıkasynda zerttelgen úlgilerdiń 99,8%-y tıesili. Atalǵan shtamdardyń sońǵy rettiligi VA.4, VA.5 jáne 0,5% BQ.1 (Tserber) nusqalarynyń 99,5%-y aınalymda ekenin kórsetti.

Koronavırýstan qorǵaýdyń jalǵyz tıimdi jáne qaýipsiz ádisi – vaktsınatsııalaý, sonymen qatar ımmýndyq reaktsııany uzaq ýaqyt saqtaýǵa múmkindik beretin kúsheıtkish.

Osyǵan baılanysty, QR Densaýlyq saqtaý mınıstrligi el halqyn KVI-ge qarsy revaktsınatsııalaýǵa jáne ujymdyq ımmýnıtetti qoldaýǵa jáne osy ınfektsııamen syrqattanýshylyqtyń ósýine jol bermeýge óz úlesin qosýǵa shaqyrady.