KVI-ge qarsy ekpe saldyrǵan meıirbıke: Ózimdi jaqsy sezinemin
NUR-SULTAN. QazAqparat – Elimizde 1 aqpannan bastap koronavırýs ınfektsııasyna qarsy vaktsınatsııa naýqany bastalǵan belgili. Alǵashqy kezeńde negizinen medıtsına qyzmetkerlerine ekpe júrgizilip jatyr. Sonyń biri - elordadaǵy №15 qalalyq emhananyń mobıldi brıgadasynyń meıirbıkesi Anar Áshimova ekpe alǵan 1 aptadan keıingi áserin bólisti, dep habarlaıdy QazAqparat tilshisi.
«Koronavırýsqa qarsy ekpe saldyrǵannan keıingi alashqy sátte ózimdi jaqsy sezingen edim. Degenmen, vaktsınadan soń ekinshi, úshinshi kúnde denemde álsizdik baıqalyp, basym aýyrǵandaı kúı keshtim. Biraq, ýaqyt óte kele mundaı sımptomdar birtindep joıyldy. Qazir vaktsına alǵanyma bir aptadan astam ýaqyt ótti jáne ózimdi jaqsy sezinemin», - dedi ol.
Osy rette medıtsına qyzmetkeri koronavırýsty jeńip, qalypty ómirge tezirek qaıta oralýymyz úshin vaktsınatsııa jasaý qajettiligin basa aıtady.
«Vaktsına jasatqan durys. Óıtkeni, ol bizdi túrli bakterııalardan, vırýstan qorǵaıdy. Sondyqtan da vaktsına alýdan esh qorqýdyń qajet joq. Óıtkeni, ol bizdiń aǵzamyzǵa kúsh-qýat berýmen qatar túrli ınfektsııadan qorǵaıdy. Negizi, vaktsına saldyrǵan adamdarda asa qaýipti vırýstyq aýrýlar jeńil túrde ótedi. Jalpy, adamdar sanıtarlyq-epıdemıologııalyq talaptardy qatań saqtap, osynaý qıyn kezeńde sabyrlyq tanyta bilse, ózderin kútinse maskasyz ómirge tezirek oralamyz», - dedi Anar Áshimova.
