KVI-ǵa qarsy vaktsına alǵandar qan donorlyǵynan 2 aptaǵa shettetiledi
NUR-SULTAN. QazAqparat – KVI-ǵa qarsy vaktsınamen ekpe alǵan adamdar qan jáne onyń komponentteriniń donorlyǵynan 2 aptaǵa shettetiledi. Bul jaıynda QR Bas memlekettik sanıtar dárigeri Erlan Qııasovtyń jańa qaýlysynda aıtylǵan, dep habarlaıdy QazAqparat tilshisi.
Qujatta ımmýnosýpressıvti em qabyldaıtyn patsıentterde jáne ımmýn tapshylyǵy bar patsıentterde jetkilikti ımmýndyq jaýap damymaýy múmkindigi eskertiledi. Sondyqtan ımmýndyq júıeniń jumysyn tejeıtin preparattardy qabyldaý ımmýnogendiliktiń tómendeý qaýpine baılanysty vaktsınatsııadan buryn jáne odan keıin kem degende 1 aı qarsy kórsetilim bolady. Jiti ınfektsııalyq jáne ınfektsııalyq emes aýrýlar ekpelerdi júrgizý úshin ýaqytsha qarsy kórsetilimder bolyp sanalady. Vaktsınatsııa saýyqqannan nemese remıssııadan keıin 2-4 aptadan keıin júrgiziledi. Jiti ishek aýrýlarynda vaktsınatsııa densaýlyq jaǵdaıy qalypqa kelgennen keıin jasalady.
«KVI-ǵa qarsy belsendiligi joıylǵan vaktsınalarmen (Hayat-Vax, QazVac, KoronaVak jáne basqalary) jáne vektorlyq vaktsınamen (Spýtnık V) ekpe alǵan adamdar qan men onyń komponentteriniń donorlyǵynan 2 aptaǵa shettetiledi. Tiri vaktsınalardy paıdalanǵan kezde egilgen adamdar qan men onyń komponentteriniń donorlyǵynan 4 apta merzimge shettetiledi. KVI-diń jiti jáne sıpmtom joq túri bar adamdar KVI-ǵa qarsy vaktsınatsııalaýǵa jatpaıdy. KVI-dy qosa alǵanda, ınfektsııalyq aýrýmen aýyratyn naýqaspen baılanysta bolǵan adamdar karantın merzimi aıaqtalǵannan keıin egiledi. Bul rette, KVI-men aýyratyn naýqaspen óziniń kásibı qyzmetiniń túri boıynsha jeke qorǵanysh quraldarynda baılanysta bolatyn medıtsına qyzmetkerleri jatpaıdy», - delingen qaýlyda.
Sondaı-aq qujatta vaktsınatsııalaý aldynda KVI-ǵa qarsy antıdenelerdiń bolýyna skrınıng (IFT jáne PTR-zertteý) júrgizilmeıtindigi atap kórsetiledi. KVI-diń kez kelgen túrimen aýyryp jazylǵan adamdardy saýyqqannan keıin jáne vaktsınatsııalaý aldyndaǵy jaı-kúıin baǵalaýdy eskere otyryp, 6 aıdan soń vaktsınatsııalaýdyń tolyq kýrsymen egý usynylady. Bul rette KVI-men aýyrǵandarǵa saýyqqannan keıin 3 aıdan soń vaktsınatsııa júrgizýge jol beriledi.
Halyqty vaktsınatsııalaý aýmaqtyq medıtsınalyq uıymdardyń egý pýnktterinde, arnaıy kontıngentti vaktsınatsııalaý - tıisti vedomstvonyń qyzmet orny boıynsha júrgiziledi. Halyq úshin vaktsınatsııalaýdyń qoljetimdiligin arttyrý jáne egý protsesin jeńildetý maqsatynda jyljymaly egý pýnktterin nemese kóshpeli egý brıgadalaryn uıymdastyrýǵa jol beriledi. Múgedekter qataryndaǵy múmkindigi shekteýli adamdardy vaktsınatsııalaý úshin KVI-ǵa qarsy vaktsınatsııalaýdy úıge baryp júrgizý uıymdastyrylady. Immýndaýǵa jatatyn adamdardyń sanyna sáıkes egý brıgadalarynyń, medıtsına qyzmetkerleriniń, onyń ishinde ımmýnologtardyń, jalpy praktıka dárigerleriniń, terapevterdiń, orta medıtsına personalynyń, medıtsınalyq bilimi bar tirkeýshilerdiń qajetti sany, vaktsınanyń, basqa da shyǵys materıaldarynyń, tońazytý jabdyǵynyń, avtokóliktiń sany esepteledi.
«Egý brıgadasy árbir egý pýnktinde 1 brıgadaǵa 300 ekpeden aspaıtyn kúndelikti júktemeni eskere otyryp qalyptastyrylady. Bul rette, 1 egý brıgadasynyń quramyna: 1 dáriger, 1 egý meıirgeri jáne qajet bolǵan jaǵdaıda 1 tirkeýshi kiredi. Aýyldyq jerlerde quramynda: 1 feldsher (dáriger bolmaǵan jaǵdaıda), 1 egý meıirgeri, qajet bolǵan jaǵdaıda 1 tirkeýshiden egý brıgadasyn uıymdastyrýǵa jol beriledi», - delingen qujatta.
