Kvazımemlekettik sektordyń bıýdjetke táýeldiligi kúsheıe tústi — Joǵary aýdıtorlyq palata
ASTANA. KAZINFORM — Bıýdjet qarajatyn ıgerý protsesinde atqarýshylyq tártip jetkiliksiz. Bul týraly Májilistiń jalpy otyrysynda 2025 jylǵy respýblıkalyq bıýdjettiń atqarylýy týraly esep bergen Joǵary aýdıtorlyq palatanyń tóraǵasy Álıhan Smaıylov aıtty.
— Kvazımemlekettik sektordyń ekonomıkaǵa jáne memlekettik qarjy júıesine kólemdi yqpaly ózgergen joq. Jekeshelendirýdiń keshendi josparyn iske asyrý qarqyny baıaýlady. Negizinen kommýnaldyq kásiporyndar ǵana básekeli sektorǵa shyǵarylýda. Jekelegen jaǵdaılarda jergilikti organdar eldi mekenderdiń abattandyrý, kóshelerdi tazartý jáne taǵy basqa da qarapaıym qajettilikterin jedel ári sapaly qamtamasyz etý múmkindiginen aıyrylýda. Sonymen birge, kvazımemlekettik sektordyń bıýdjetke táýeldiligi kúsheıe tústi. 2025 jyly olarǵa 812 mlrd teńge bólindi, onyń 57 paıyzy — memlekettik tapsyrmalar arqyly, — dedi ol.
Palata tóraǵasynyń aıtýynsha, memlekettik tapsyrmanyń ózi vedomstvolyq baǵynysty uıymdardy konkýrstan tys qarjylandyrý nysanyna aınalyp otyr. Jekelegen jaǵdaılarda jumystar men kórsetiletin qyzmetterdiń edáýir bóligi basqa jeke oryndaýshylarǵa beriledi.
— Kvazımemlekettik sektor sýbektileri memlekettik satyp alý aıasynda taǵy da 1,4 trln teńge aldy. Jalpy, bıýdjet qarajatyn ıgerý protsesinde atqarýshylyq tártiptiń jetkiliksiz deńgeıi jáne nátıjeliktiń shektelgeni baıqalady. Jekelegen sýbektilerdiń qolma-qol aqshany baqylaý shottaryndaǵy talap etilmegen qaldyqtary qomaqty. Úkimettiń esebine kvazımemlekettik sektor boıynsha aqparattyń engizilgenine qaramastan, olardyń jalpy eldegi mindetterdi iske asyrýǵa tıgizetin yqpaly ashyp kórsetilmegen, — dedi Álıhan Smaıylov.
Aıta keteıik, Májilistiń jalpy otyrysynda QR Úkimetiniń jáne Joǵary aýdıtorlyq palatanyń 2025 jylǵy respýblıkalyq bıýdjettiń atqarylýy týraly esepteri talqylanyp jatyr.
