Kvazımemlekettik sektordaǵy memlekettik satyp alý erejelerine ózgeris engizildi
ASTANA. KAZINFORM — Qazaqstannyń Qarjy mınıstrligi kvazımemlekettik sektordyń jekelegen sýbektileri júzege asyratyn satyp alý erejelerine ózgerister engizdi, dep habarlaıdy Kazinform tilshisi.
Tıisti buıryqqa 2026 jylǵy 8 mamyrda qol qoıyldy. Qujatqa sáıkes, tender ótkizý kezinde elektrondy satyp alý júıesiniń operatory satyp alý qorytyndysy shyqqanǵa deıin jetkizýshilerdiń baǵa usynystarynyń qupııalyǵyn qamtamasyz etedi.
Qorytyndy hattama jarııalanǵannan keıin tenderge qatysýshylar basqa áleýetti jetkizýshilerdiń ótinimderin kóre alady, alaıda olardyń baǵa usynystary qoljetimsiz bolady.
Sondaı-aq jetkizýshilerdiń quqyqtyq qabiletin rastaýǵa qoıylatyn talaptar naqtylandy. Eger memlekettik tsıfrlyq júıelerde qajetti málimetter bolmasa, jetkizýshi tıisti ruqsattyń nemese habarlamanyń kóshirmesin usynýy tıis.
Ózgerister qarjylyq turaqtylyq krıterıılerine de áser etti. Endi áleýetti jetkizýshi sońǵy úsh jyldaǵy tabysy 4100 AEK-ten assa nemese satyp alý somasynyń keminde jartysyn qurasa, qarjylyq turǵydan turaqty dep esepteledi. Sonymen qatar tólengen salyq kólemi kompanııa tabysynyń keminde úsh paıyzyn quraýy qajet.
Erejelerge shart jasasýdan jaltarǵan, jalǵan aqparat bergen nemese mindettemelerin tıisinshe oryndamaǵan jetkizýshilerdi josyqsyz satyp alý qatysýshylary tizilimine engizý týraly norma da qosyldy.
Ótinimderdi qamtamasyz etý máselesine de erekshe nazar aýdarylǵan. Endi jetkizýshiler ony elektrondy ámııandaǵy qarajat nemese elektrondy formattaǵy bank kepildigi túrinde usyna alady.
Elektrondy ámııan arqyly engizilgen qarajat jeńimpaz shartqa qol qoıýdan bas tartqan nemese shartty oryndaýdy qamtamasyz etý talaptaryn oryndamaǵan jaǵdaıda buǵattalyp, qaıtarylmaıdy. Mundaı jaǵdaıda qarajat tapsyrys berýshiniń kirisine aýdarylady.
Jańa erejege sáıkes, baǵa usynystary birdeı bolǵan jaǵdaıda tender jeńimpazy retinde qarjylyq turaqtylyq kórsetkishi joǵary qatysýshy tanylady. Eger bul kórsetkishter de teń bolsa, ótinimdi birinshi bolyp tapsyrǵan jetkizýshige basymdyq beriledi.
Buıryq 2026 jylǵy 12 shildeden bastap kúshine enedi.
Buǵan deıin Qaraǵandy oblysynda memlekettik satyp alý boıynsha zań buzǵan 12 laýazym ıesi jazalanǵany belgili boldy.
