Kvazımemlekettik sektor óz qyzmetindegi barlyq aqparatty Parlamentke usynady – mınıstr
Endi kvazımemlekettik sektor óziniń bıýdjeti boıynsha Parlamentke jıi shaqyrtylady. Bul týraly Májiliste jańa redaktsııadaǵy Bıýdjet kodeksiniń jobasyn talqylaýdan keıin Ulttyq ekonomıka mınıstri Álibek Qýantyrov aıtty, dep habarlaıdy Kazinform.
«Kvazımemlekettik sektordyń ókilderi bıýdjetti qorǵaǵan kezde Májiliske nemese máslıhatqa keledi. Atap aıtqanda, olar depýtattardyń suraqtaryna jaýap berýi kerek. Josparlaý, shyǵystar men kirister, qarajattyń ıgerilýi, damý jospary boıynsha tıisti ındıkatorlardy kórsetip, búkil aqparatty beretin bolady», - dedi Á. Qýantyrov Parlament Májilisinde tilshiler suraǵyna jaýap bere otyryp.
Atap aıtqanda, Respýblıkalyq bıýdjet týraly zańda bıýdjetke taza kiristerdi aýdarý normatıvterin jáne kvazımemlekettik sektor sýbektileriniń syrttan qaryz alý lımıtin belgileý arqyly kvazımemlekettik sektor sýbektileriniń qyzmetine parlamenttik baqylaý kúsheıtiledi.
«Bizdiń usynysymyz boıynsha Respýblıkalyq bıýdjet týraly zańda tıisti lımıtin, shekteýdi qoıýǵa Májilistiń quqyǵy bolady», - dedi mınıstr.
Aıta keteıik, búgin Májilistiń jalpy otyrysynda Qazaqstan Respýblıkasynyń Bıýdjet kodeksiniń jobasy men ilespe qujat birinshi oqylymda maquldandy.
Jańa Bıýdjet kodeksi birneshe mańyzdy mindetterdi sheshýge baǵyttalǵan. Birinshiden, bıýdjettik protsesterdi jeńildetý eskerilgen. Ekinshisi – bloktyq bıýdjettiń elementterin engizý. Úshinshi mindet – memlekettik qarjyny shoǵyrlandyryp basqarý úshin zańnamalyq negiz qurý. Tórtinshi – bıýdjetaralyq qatynastardy jetildirý. Besinshi – nátıjege baǵyttalǵan bıýdjet qaǵıdattaryn kúsheıtý jáne nátıjelerdi basqarý quraldaryn jetildirý.
