Kvazımemlekettik kompanııalardyń taza kirisi jóninde aqparat berý erejeleri ózgeredi

Bul týraly buıryqqa Premer-mınıstrdiń orynbasary — Ulttyq ekonomıka mınıstri 18 maýsymda qol qoıdy.

— Osy Kvazımemlekettik sektor sýbektileriniń tıisti bıýdjetke aýdarymdardan nemese dıvıdendter tólengennen keıin qalǵan taza kiris qarajatyn paıdalanýy týraly aqparat berý qaǵıdalary men nysandary Bıýdjet kodeksiniń 56-baby 4-tarmaǵyna jáne «Memlekettik statıstıka týraly» zańnyń 16-baby 3-tarmaǵynyń 2) tarmaqshasyna sáıkes ázirlendi jáne kvazımemlekettik sektor sýbektileriniń tıisti bıýdjetke aýdarymdardan nemese dıvıdendter tólengennen keıin qalǵan taza kiris qarajatyn paıdalanýy týraly aqparat berý tártibin aıqyndaıdy, — delingen qujatta.

Endi uıymnyń atqarýshy organy esep berip otyrǵan jyldan keıingi kelesi jyldyń 1 aqpanyna deıin esepti daıyndaýy tıis. Mysaly, 2025 jyl úshin beriletin esep 2027 jyldyń 1 aqpanyna deıin ázir bolýy kerek. Atalǵan qujat uıymnyń jyldyq qarjylyq eseptiligi, memlekettik kásiporynnyń jáne memleket baqylaýyndaǵy aktsıonerlik qoǵamnyń nemese jaýapkershiligi shekteýli seriktestiktiń damý josparynyń oryndalýy týraly esebi, sondaı-aq uıymnyń basqarý organdarynyń taza tabysty bólý tártibi jónindegi sheshimderi negizinde jasalady.

Esep uıym dıvıdendter tóleýden nemese tıisti bıýdjetke aýdarymdar jasaýdan bosatylǵan jaǵdaıda da daıyndalady.

Uıym esep berilip otyrǵan jyldan keıingi kelesi jyldyń 5 aqpanynan keshiktirmeı memlekettik aktsııalar paketin (jarǵylyq kapıtaldaǵy qatysý úlesin) ıelený jáne paıdalaný quqyqtaryn júzege asyratyn tıisti memlekettik organǵa, jergilikti atqarýshy organǵa nemese aýdandyq mańyzy bar qala, aýyl, kent, aýyldyq okrýg ákiminiń apparatyna dıvıdendterdi nemese tıisti bıýdjetke aýdarymdardy tólegennen keıin qalǵan taza tabys qarajatynyń paıdalanylýy týraly aqparatty tıisti bıýdjettiń atqarylýy jónindegi jyldyq eseptiń quramyna engizý úshin usynady.

Esepke túsindirme jazba qosa beriledi. Ol taza tabys qarajatyn paıdalanýdyń árbir baǵyty boıynsha aqparatty qamtıdy jáne eseptiń ajyramas bóligi sanalady.

Esepte dıvıdendter tólengennen nemese tıisti bıýdjetke aýdarymdar jasalǵannan keıin qalǵan taza tabystyń naqty paıdalanylýy týraly aqparat kórsetiledi.

Esep pen túsindirme jazbaǵa uıymnyń atqarýshy organynyń basshysy qol qoıady.

Aktsıonerlik qoǵamnyń (JShS-nyń) memlekettik aktsııalar paketin (jarǵylyq kapıtaldaǵy qatysý úlesin) ıelený jáne paıdalaný quqyqtaryn júzege asyratyn ne memlekettik kásiporyndardy basqarýdy júzege asyratyn memlekettik organdar esepti jyldan keıingi kelesi jyldyń 10 aqpanynan keshiktirmeı uıymdardyń esepterin bıýdjetti atqarý jónindegi ortalyq nemese jergilikti ýákiletti organǵa usynady.

Budan ári uıymdardyń esepteri respýblıkalyq nemese jergilikti bıýdjettiń atqarylýy týraly jyldyq eseptiń quramyna engiziledi.

Buıryq 4 shildeden bastap qoldanysqa engiziledi.

Aıta keteıik, buǵan deıin kvazımemlekettik sektordaǵy memlekettik satyp alý erejelerine ózgeris engizilgenin jazǵanbyz.