Kvazımemlekettik sektordyń eksporttyq valıýta túsiminiń bir bóligi satylatyn boldy
NUR-SULTAN. QazAqparat - Kvazımemlekettik sektor sýbektileriniń eksporttyq valıýtalyq túsiminiń bir bóligi satylatyn boldy, dep habarlaıdy QazAqparat Ulttyq banktiń baspasóz qyzmetine silteme jasap.
Qazaqstan Respýblıkasy Prezıdentiniń tapsyrmasyna sáıkes ulttyq valıýtanyń aıyrbastaý baǵamyn turaqtandyrý maqsatynda Úkimet kvazımemlekettik sektor sýbektileriniń eksporttyq valıýtalyq túsiminiń bir bóligin ishki valıýta naryǵynda satý týraly sheshim qabyldady.
«Atalǵan sheshim jarǵylyq kapıtalynda memlekettiń úlesi 50%-dan asatyn eksporttaýshy kásiporyndarǵa, onyń ishinde «Samuryq-Qazyna» ulttyq ál-aýqat qory» AQ kompanııasyna qoldanylady jáne tótenshe jaǵdaı kezeńinde qoldanysta bolady. Úkimet jáne Ulttyq bank ishki valıýta naryǵyndaǵy shetel valıýtasyna suranys pen usynysqa monıtorıng júrgizý maqsatynda úılestirilgen jumysyn jalǵastyrady» delingen habarlamada.
Qabyldanatyn sharalar aıyrbastaý baǵamyn turaqtandyrýǵa, valıýta usynysyn qamtamasyz etýge, negizsiz qubylmalylyqty boldyrmaýǵa baǵyttalǵan jáne irgeli úrdisti qalyptastyrýǵa kedergi keltirmeıdi.
